२० मंसिर, एजेन्सी ।
राष्ट्रपतीय कार्यकाल समाप्त हुने बेलामा छोरा हन्टरलाई आममाफी दिएर अमेरिकी राष्ट्रपति जो बाइडनले राजनीतिक जीवनको उत्तरार्धमा बदनामी रोजेका छन् । ८२ वर्षीय बाइडनको कार्यकाल सन् २०२५ जनवरी २० मा समाप्त हुँदैछ ।
सोही दिन नवनिर्वाचित राष्ट्रपति डोनाल्ड जे. ट्रम्पले पदबहाली गर्नेछन् । वयोवृद्ध उमेरका बाइडन सायद त्यसपछिका दिनमा सक्रिय राजनीतिक र सार्वजनिक जीवनमा नरहलान् । राष्ट्रपतिजस्तो उच्च पदमा निर्वाचित हुनुका बाबजुद बाइडन एक प्रभावशाली र प्रखर राजनीतिज्ञ कहिल्यै मानिएनन् ।
तर, उनलाई एक शालीन, भद्र, धेरै नबिगार्ने, खराब काम नगर्ने र विधिको शासन पालना गर्ने विरासतको नेता मानिन्थ्यो । तर, पुत्रमोहले उनको यो छविसमेत ध्वस्त भएको छ । सन् २०२० मा उनी सत्तामा आउँदा ट्रम्प र बाइडनको तुलना यही कारणले हुने गर्दथ्यो कि ट्रम्प स्वेच्छाचारी छन् तर, बाइडनले अमेरिकी मूल्य प्रणाली र विधिको शासनको पालना गर्नेछन् ।
बाइडनको यो निर्णयले उनको डेमोक्र्याटिक पार्टीको प्रतिष्ठा झनै गिर्नेछ । डेमोक्र्याटिक समर्थकहरूले शिर निहुराउनुपर्ने स्थिति उत्पन्न हुनेछ । भर्खरै निर्वाचनमा पराजित भएको पार्टीको मनोबल त्यसै पनि कमजोर थियो ।
पार्टीको पराजयका लागि समेत कतिपय समर्थक बाइडनका कमजोरीलाई जिम्मेवार ठान्दथे । उनी अन्तिम बेलासम्म पनि दोस्रो कार्यकालका लागि आफैँ उम्मेदवार हुने मनस्थितिमा थिए । तर, प्राइमरीको अवधि गुजारेर उनी फिर्ता भए तर, उपराष्ट्रपति कमला ह्यारिसलाई उम्मेदवारका रूपमा अघि सारे ।
ह्यारिसको हारमा उम्मेदवार छनोटका कमजोरी र बाइडन प्रशासनको खराबीलाई जिम्मेवार ठानिन्थ्यो । अर्थात् लामो राजनीतिक जीवन र कठिन सङ्घर्षबाट बाइडनले जुन प्रतिष्ठा कमाएका थिए, उत्तरार्धमा आफैँले त्यसलाई मटियामेट पारेका छन् ।
बाइडनको आममाफीको निर्णयले अमेरिकी परम्पराको राज्यको शुद्धता र निष्पक्षतामा मात्र हैन, न्यायिक प्रणालीलाई समेत अविश्वसनीय बनाउँछ । कोलोराडोका डेमोक्रेटिक सिनेटर माइलक बेनेटकाअनुसार ‘बाइडनले पुत्रप्रेममा परेर राजनीतिक धर्म निर्वाहको दायित्व बिर्सेका छन् ।
राज्यको उत्तरदायित्व निर्वाह गर्दा यसरी व्यक्तिगत तथा पारिवारिक स्वार्थ हेरिनु हुँदैनथ्यो ।’ हन्टरलाई दिइएको आममाफी पछि उठेका सार्वजनिक प्रश्नको राष्ट्रपति बाइडनले कुनै चित्तबुझ्दो उत्तर दिएका छैनन् । सायद उनीसँग कुनै उत्तर पनि छैन ।
यो विषयमा पत्रकारको प्रश्नले अन्य डेमोक्रेट नेताहरू भने हैरान हुँदैछन् । उनीले कार्यकाल पूरा गर्नै लाग्दा गरिएको एक सर्वेक्षणमा उनको लोकप्रियता सर्वाधिक कमजोर बिन्दुमा झरेको छ । बाइडनले ३७.७ प्रतिशतको मात्र अनुमोदन पाएका छन् ।
बाइडनपुत्र हन्टरलाई केही दशकयता कर छली, सम्पत्ति शुद्धीकरण, अवैध बन्दुक र चीनसँग गोप्य डिललगायतका आरोप लाग्दै आएका थिए । सङ्घीय जाँच ब्यूरोले सन् २०१८ पछि हन्टरविरूद्ध जाँच गर्न थालेको थियो ।
बाइडनपुत्र हन्टरले एक चिनियाँ कम्पनीलाई आफैँले पैसा दिई पुनश्चः वैदेशिक लगानीका रूपमा भित्र्याएका आरोप सन् २०१९ को राष्ट्रपतीय निर्वाचन अभियानकै क्रममा लागेको थियो । हन्टरमाथि क्यालिफोर्नियामा १४ लाख डलर कर छलीको मुद्दा चलिरहेको थियो ।
हन्टरमाथि डेलाबर राज्यमा अवैध बन्दुकसम्बन्धी मुद्दा थियो । उनीमाथि चलिरहेका मुद्दाको सजाय यति कडा थियो कि उनलाई १७ देखि २५ वर्षसम्म जेल सजाय हुन सक्दथ्यो ।
डिसेम्बर १ मा आममाफी घोषणामार्फत राष्ट्रपति जो बाइडनले ५४ वर्षीय छोरा रोबर्ट हन्टरमाथिका यी सबै आरोप राष्ट्रपतीय विशेष अधिकार प्रयोग गरी खारेज गरिदिएका छन् ।सोमबारको कांग्रेस बैठकमा केही डेमोक्रेटिक सांसदले बाइडनको आममाफीको निर्णयलाई कडा चुनौती दिएका छन् ।
