२१ माघ ,एजेन्सी ।
डोनाल्ड ट्रम्पले राष्ट्रपतिका रुपमा अमेरिकाको नेतृत्व सम्हालेयता गैरकानूनी रुपमा बसिरहेका आप्रवासीमाथि लगातार धरपकड जारी रहेको अमेरिकी संचारमाध्यामहरुले जनाएका छन् । अवैध रुपमा बसिरहेका त्यस्ता आप्रवासीहरुलाई अभियुक्तका रुपमा हत्कडीसहित देश निकाला गरिरहेका भिडिओहरु समेत सार्वजनिक भएका छन् ।
अमेरिकाका विभिन्न शहरमा इमिग्रेशन एण्ड कस्टम इन्फोर्समेन्ट आइसले कागजपत्रविहिन आप्रवासीहरुलाई पक्राउ गर्नका लागि लगातार छापा मार्दा यसबाट त्याहा रहेका १३ सय नेपाली समेत उनीहरुको निशानामा पर्नेछन् ।
नेपालीहरुको तथ्याङकीय सूची आइसले सार्वजनिक गरिसकेको छ । यस्तो अवस्थामा यदि घरमा आइसका एजेन्टहरु आएमा के गर्ने ? भन्ने विषयमा न्युयोर्क इमिग्रेशन कोलिएशनले सुझावहरु दिएको छ ।
कोलिएशनले यदि घरमा आइसका एजेन्टहरु आएर ढोका खोल्न भनेमा तुरुन्तै ढोका नखोल्न र उनीहरुसँग वारेन्ट भए नभएको सोध्न आग्रह गरेको छ । अध्यागमन अधिकारीहरु प्रहरीहरुजस्तै सिधै घरमा प्रवेश गर्न नसक्ने र उनीहरुसँग न्यायाधीशले हस्ताक्षर गरेको नामसहितको वारेन्ट हुने कोलिएशनले जनाएको छ ।
यदि वारेन्ट भएको खण्डमा पनि ढोकाको प्वालबाट भित्र छिराउन वा झ्यालको छेउमा राख्न लगाउन भनिएको छ । उक्त वारेन्ट आफ्नो नाममा भए नभएको सुनिश्चित गर्न र वारेन्ट कसको नाममा जारी गरिएको हो , राम्रोसँग पढ्न अनुरोध गरिएको छ ।
वारेन्ट भएपनि त्याहा घरमा रहेका ब्यक्तिको नाम नभई अरु कसैको नाम छ भने उनीहरु उक्त वारेन्टका आधारमा घरभित्र छिर्न नसक्ने उल्लेख छ । यस्तो अवस्थामा वारेन्टमा नाम उल्लेख गरिएको ब्यक्ति त्याहा नभएको जानकारी गराउन भनिएको छ।
साथै भित्र प्रवेशका लागि अनुमति दिन नसक्ने बताउन पनि सुझाव दिइएको छ । यदि चिनेको तर त्यहाँ नबस्ने व्यक्तिका नाममा वारेन्ट भएपनि उक्त व्यक्ति बस्ने ठेगाना बताउन आवश्यक नरहेको पनि भनिएको छ ।
यदि उनीहरुका साथमा वारेन्ट छ भने पनि आफू मौन बस्ने अधिकारको प्रयोग गर्न सक्ने र आफूसँग मौन बस्ने अधिकार रहेको बताउँदा पनि उनीहरुले वेवास्ता गरेमा आफ्नो भनाई दोहोर्याउन भनिएको छ । यस्तो अवस्थामा उनीहरुले कुनै कागजातमा हस्ताक्षर गर्न लगाएमा हस्ताक्षर नगर्न र हस्ताक्षर गर्नु अगाडि कानुन व्यवसायीको सहायता लिने बताउन सुझाव दिइएको छ ।
यस्तो अवस्थामा अध्यागमन अधिकारीहरुलाई पासपोर्ट लगायत आफ्नो देशको कुनै परिचयपत्र वा कागजात नदिन र यदि उनीहरुसँग आफ्नो नाममा वारेन्ट छ र पक्राउ गरेका छन् भने पनि कुनै पनि कागजातमा हस्ताक्षर नगर्न , उनीहरुले भनेका कुनै पनि कुरा स्वीकार नगर्न भनिएको छ ।
साथै आफूसँग सधै आफूले सम्पर्क गर्न सक्ने कानुन व्यवसायीको नम्बर राख्न पनि सुझाव दिइएको छ । आइसका एजेन्टसँगको कुराकानी अडिओ वा भिडिओमा रेकर्डी गर्न पनि सुझाव दिइएको छ ।
यस्तै अध्यागमन अधिकारीहरुलाई कुनै पनि गलत कागजात वा परिचयपत्र नदेखाउन साथै भाग्ने वा पक्राउ गर्न खोज्दा भौतिकरुपमा प्रतिरोधको प्रयास पनि नगर्न अनुरोध गरिएको छ । यदि अमेरिकाको ग्रिनकार्ड होल्डर भएपनि बर्षौ पहिले कुनै अपराध गरेको भए त्यस्ता ब्यक्ति पनि आइसको निशानामा पर्न सक्ने छन् ।
यस्तै कागजपत्रविहिन, मादक पदार्थ सेवन गरेर गाडी चलाउने वा कुनै लागुऔषध, घरेलु हिंसा वा गैरकानुनी बन्दुक बोक्ने अपराधमा संलग्न भएका ब्यक्तिहरुपनि आइसको मुख्य निशानामा पर्न सक्ने न्युयोर्क इमिग्रेशन कोलिएशनले जनाएको छ ।
अमेरिकाले १४ लाख भन्दा बढी आप्रवासीलाई उनीहरूकै देश फर्काउने भएको छ । अमेरिकाको इमिग्रेसन एण्ड कस्टम इनफोर्समेन्ट (आईसीई) ले सूची सार्वजनिक गर्दै तत्काल १३ सय ६५ नेपालीसहित १४ लाख ४५ हजार ५ सय ४९ जना अमेरिकाबाट निष्कासन गर्ने सूची नै सार्वजनिक गरिसकेको छ ।
अमेरिकामा बस्ने ५–६ लाख नेपालीमध्ये २–३ लाखको ग्रिनकार्ड रहेको अनुमान छ । यस्तै विद्यार्थी भिसा, भिजिट भिसा, अस्थायी भिसाजस्ता वैधानिक प्रक्रियाबाट अमेरिका पुगेकालाई यदि कुनैपनि अपराधमा सम्लग्न रहेको छैन् भने ट्रम्प नीतिले केही फरक पार्ने छैन् ।
