३ चैत , काठमाण्डौ ।
गएको प्रतिनिधिसभाबाट राष्ट्रिय राजनीतिमा शसक्त रुपमा उदाएका नागरिक उन्मुक्ति पार्टी र जनमत पार्टी एक हुने भएका छन् । यसका लागि दुवै दलका नेताहरुले तयारी थालेका छन् । यसै मेसोमा आज नागरिक उन्मुक्तिकी अध्यक्ष रञ्जिता श्रेष्ठ र जनमत पार्टीका अध्यक्ष डा. चन्द्रकान्त राउतबीच छलफल भएको छ ।
उनीहरूबीच आज दिउँसो नयाँ बानेश्वर संसद् भवनमा छलफल भएको हो । सो छलफल सकारात्मक रहेको रञ्जिताले बताएकी छन् । छलफलका क्रममा श्रेष्ठले ’पार्टी एकताबारे तपाईंको धारणा के हो, के हुँदैछ ?’ भनेर राउतलाई सोधेकी थिइन् ।
जवाफमा राउतले आफूले सबैको सहमतिमा नै एकता हुनुपर्ने धारणा राखेको बताएका थिए । राउतलाई उद्धृत गर्दै श्रेष्ठले भनिन्, ’डा. साबले त्यसरी जबरजस्ती एकता गर्ने होइन, सबैको सहमतिमा गर्ने हो भनेर भन्नुभयो।’ राउतसँगको छलफलपछि श्रेष्ठले भनिन्, ’सकारात्मक कुराकानी भयो । पार्टी एकता हुँदा सबैको सहमतिमा हुन्छ। तर, बाहिर भनिएजसरी तत्कालै एकता हुने होइन। त्यो प्रक्रियाअनुसार हुन्छ।’
श्रेष्ठले अब चाँडै राउत, पार्टी संरक्षक रेशम चौधरीसहित आफूहरू तीन जनाको बीचमा पनि छलफल हुने बताइन्। त्यसपछि मात्रै आफूहरू ठोस निर्णयमा पुग्ने उनले बताएकी छन्। यसअघि राउत र चौधरीका बीचमा निरन्तर पार्टी एकताबारे संवाद भइरहेको थियो ।
चौधरीले त राउतको जनमत पार्टीसँग चाँडै एकताको घोषणा हुने भन्दै ९ बुँदे सम्झौतासमेत भइसकेको बताएका थिए । यसपछि अध्यक्ष श्रेष्ठले राउतसँग पहिलोपटक आधिकारिक रूपमा संवाद गरेकी हुन् । जनमत पार्टीसँग एकता गर्ने विषयमा नागरिक उन्मुक्ति पार्टीले तल्लो तहबाट छलफल अगाडि बढाएको छ ।
पार्टी एकताको विषयलाई लिएर पार्टीका अध्यक्ष रञ्जिता श्रेष्ठ र संरक्षक रेशम चौधरी बिच मतान्तर रहेपनि संरक्षक चौधरीले एकता प्रक्रियालाई अगाडि बढाएका हुन् । एकताको विषयमा तलैबाट छलफल गराएर केन्द्रमा पु¥याउने र त्यसैको आधारमा पार्टीले निर्णय गर्ने पार्टीका नेताहरुले बताएका छन् ।
एकताको विषयमा पार्टीमा कुनै विवाद छैन, एकताको विषयमा तल पनि नेता तथा कार्यकर्ताहरूसँग कुरा बुझ्ने काम भइरहेको छ सबै राय बुझेर त्यसको रिपोर्ट माथि केन्द्रमा पठाउने र केन्द्रले त्यसैको आधारमा निर्णय रञ्जिताले बताएकी छन् ।
एकताको विषयमा अहिले हरेक तहमा छलफलहरू भइरहेका बताउँदै उनले जनमत पार्टीका नेताहरूसँग पनि कुराकानी भइरहेको जानकारी दिइन । उनले चैत ८ गतेदेखि बस्न लागेको नागरिक उन्मुक्ति पार्टीको केन्द्रीय समितिको बैठकले सबै विषय टुंगो लगाउने भनिन् ।
यता, जनमत पार्टीले पनि एकताको विषयमा आन्तरिक छलफलहरू चलाएको छ । पार्टी एकताका लागि छलफल गर्न जनमत पार्टीले तीन सदस्यीय कार्यदल गठन गरिसकेको छ। कार्यदलमा उपाध्यक्ष अब्दुल खान, प्रवक्ता डा.शरत यादव र पार्टीका नेता बालगोविन्द चौधरी रहेका छन् ।
कार्यदलका सदस्य बालगोविन्द चौधरीले भने, ‘एकता प्रक्रिया सकारात्मक रूपमा अगाडि बढेको छ, नागरिक उन्मुक्ति पार्टीका नेताहरूसँग आन्तरिक रूपमा छलफल चलिरहेको छ, चाँडै टुङ्गो लाग्छ ।’
तराई मधेसमा पहिलो शक्ति बनाउने गरी जनमत पार्टीले केन्द्रीय समितिबाट निर्णय गरेर एकता प्रक्रियालाई अगाडि बढाएको हो । प्रतिनिधिसभामा जनमतको ६ र नागरिक उन्मुक्तिको ४ सिट छ ।
नागरिक उन्मुक्तिका सांसद प्रदेशतर्फ सबैभन्दा बढी सुदूरपश्चिममा सात जना छन् । त्यस्तै लुम्बिनीमा चार र मधेसमा एक सांसद छन् । मधेस प्रदेशमा जनमत पार्टीका १३ सांसद छन् भने लुम्बिनी प्रदेशमा तीन जना सांसद छन् ।
