३ भदौ , काठमाण्डौ ।
भारतीय क्रिकेट कन्ट्रोलबोर्ड (बीसीसीआई) का प्रमुख चयनकर्ता अजित आगरकर र टी–२० कप्तान सूर्यकुमार यादवले एसिया कप २०२५ का लागि भारतीय टोलीको घोषणा गरेका छन् ।
बीसीसीआईको मुम्बई स्थित मुख्यालयमा आयोजित एक पत्रकार सम्मेलनमा एसिया कपको उपाधि रक्षा गर्न मैदानमा उत्रिने खेलाडी हरूको नाम सार्वजनिक गरिएको हो।
भारतको आयोजनामा सेप्टेम्बर ९ देखि यूएईमा सुरु हुने यस प्रतियोगिताका लागि टी–२० विश्वकप २०२४ पछि पहिलो पटक तीव्र बलर जसप्रित बुमराहले टोलीमा पुनरागमन गरेका छन् भने श्रेयस अय्यर जस्ता खेलाडी टोलीमा पर्न असफल भएका छन्।
टी–२० ढाँचामा आयोजना हुने एसियाकपमा भारत समूह ’ए’ मा पाकिस्तान, यूएई र ओमानसँग परेको छ। युवा ब्याट्सम्यान शुभमन गिल लाई टोलीको नयाँ उपकप्तान बनाइएको छ।
टोलीमा युवा खेलाडी अभिषेक शर्मा, तिलकवर्मा र सञ्जु सामसन जस्ता खेलाडीले शीर्ष क्रम सम्हाल्ने छन् भने हार्दिक पाण्ड्या, शिवम दुबे र अक्षर पटेल जस्ता अलराउन्डर हरूले टोलीलाई सन्तुलन प्रदान गर्नेछन्।
बलिङ तर्फ जसप्रित बुमराहको पुनरागमनले तीव्रता पाएको छ भने अर्शदीप सिंह र हर्षित राणाले तीव्र बलिङ आक्रमणको नेतृत्व गर्ने छन्। स्पिन विभागमा वरुण चक्रवर्ती र कुलदीप यादवले जिम्मेवारी पाएका छन्।
टोली घोषणा हुँदा केहीआश्चर्यजनक निर्णयहरू पनि देखिए, जसमा केही योग्य खेलाडीहरूले स्थान बनाउन नसकेको भारतीय संचारमाध्यामहरुले उल्लेख गरेका छन् ।
आईपीएल २०२४ माआफ्नो कप्तानीमा कोलकाता नाइट राइडर्सलाई उपाधि जिताएका श्रेयस अय्यरलाई टोलीबाट बाहिर राखिएको छ, जुन सबैभन्दाआश्चर्यजनक निर्णय हो।
यस्तै भारतका लागि टी–२० मा दोस्रो सर्वाधिक ९६ विकेट लिने अनुभवी स्पिनर चहललामो समयदेखि टोलीबाहिर छन् र यसपटक पनि उनलाई बेवास्ता गरिएको छ।
आफ्नो धारिलो बलिङका लागि परिचित अनुभवी तीव्र बलर मोहम्मद शमीपनि टोलीमा परेका छैनन्। यस्तै युवाविकेटकिपर ब्याट्सम्यान इशान किशन चोटका कारण छनोटका लागि उपलब्ध थिएनन्।
भारतका लागि ४२ टी–२० मा ६१ विकेट लिएका युवा स्पिनर रवि बिश्नोई पनि छनोटकर्ताको नजरमा पर्न सकेनन् भने आईपीएलमा उत्कृष्ट प्रदर्शन गरेका युवा विकेटकिपर ध्रुव जुरेलको स्थानमा सञ्जु सामसन र जितेश शर्मालाई प्राथमिकता दिइएको छ।
एसिया कपको समूह’बी’मा भने श्रीलंका, बंगलादेश, अफगानिस्तान र हङकङ रहेका छन् । एसियाकपमा भारतले अहिले सम्म सर्वाधिक ८ पटक, श्रीलंकाले ६ पटक र पाकिस्तानले २ पटक उपाधि जितेका छन् ।
