विराटनगर,असोज १८
प्रदेश नम्बर १ को नाम र राजधानीको टुंगो लगाउन प्रदेश सरकारले तयारी गरिरहेको बेला साझा धारणा बनाउन बसेको प्रमुख प्रतिपक्षी दल नेपाली कांग्रेसले पनि नाम र राजधानीमा छलफल सुरु गरेको छ ।
छलफलमा राजधानी र नाममा टुंगोमा नपुगेपनि राजधानी बिकेन्द्रीत गर्न नहुने पक्षमा कांग्रेसका अधिकांश सांसद उभिएका छन् । बिहीबार बसेको प्रदेश संसदीय दलको बैठकले राजधानी विकेन्द्रीत गर्न नहुने निर्णय गरेको कांग्रेसका सचेत सुयर्माराज राईले जानकारी दिए ।
राजधानी र प्रदेशको नामबारे पनि कांग्रेसले ठोस निर्णय गर्ने बताउँदै कांग्रेस संसदीय दलका प्रमुख सचेतक केदार कार्र्कीले त्यसका लागि केहीदिनमा पार्टी नेतृत्वसहित अर्काे बैठक बस्ने जानकारी दिए ।
प्रदेशसभामा दुईतिहाई मत रहेको नेपाल कम्युनिष्ट पार्टीले राजधानी र नामबारे गएको आइतबार र सोमबार संसदीय दलको बैठकमा सांसदहरुको धारणा बुझेको थियो । बैठकमा केही सांसद र मन्त्रीहरुले धारणा राख्न भने बाँकी नै छ ।
नेकपाका ६७ सांसदमध्ये ५४ सांसदले बोलेपछि स्थगित भएको बैठक कहिले बस्ने भन्ने मिति तोकिएको छैन । नेकपाका सांसदहरुले नाम र राजधानीबारे मिश्रित धारणा राखेपनि राजधानी विकेन्द्रीत गर्न नहुने पक्षमा भने अधिकांश नेकपाका सांसद उभिएका छन् ।
मुख्यमन्त्री शेरधन राईले सबै सांसदको चित्त बुझाउनेगरी राजधानी विकेन्द्रीत गर्ने प्रस्ताव गरिरहेको बेला त्यसविरुद्ध आफ्नै पार्र्टी र विपक्षी सांसदहरु समेत उभिएपछि प्रदेश १ राजधानी विकेन्द्रीत नहुने लगभग निश्चित देखिएको छ ।
