२६ असोज , काठमाण्डौ ।
अरे ठुमक ठुमक जब हिट छै तू पहाड़ी बाटयूं मां छम छम पायल घुंघरू बजनी त्यार खूटयो मा लाल त्यार कंगन हाथों मा चूड़ी छन हरा चुनरी तेरी गुलामी सरारा ।।
भारतको उत्तराखण्डको गढवाली भाषाको यो गीतले एउटी युवतीको सुन्दरताको बयान गर्दछः जसको शाब्दिक अर्थहुन्छ,
अरे, जब तिमी ठुम्किँदै नाच्दै वा लजाउँदै , पहाडी बाटोबाट हिँड्छ्यौ, तिम्रो पायल र घुँघरूको “छमछम” आवाज , तिम्रो खुट्टामा रमाइरहेको हुन्छ। तिम्रो हातमा रातो कंगन बाला छन्, र हरिया चुराहरू चम्किरहेका छन्, तिम्रो चुनरी ओढने यति सुन्दर र चम्किलो छ, जसको मोहमा म मानौँ तिम्रो गुलामझैँ भइसकेको छु तिम्रो सिंगार र रूपले मनै हराएको छ ।
यो उत्तराखण्डको गीत भएपनि यतिबेलासम्म नेपालमा सामाजिक संजाल विशेषगरी टिकटकमा यो गीतबाट बनाएका भिडियोहरुले लोकप्रियता चुमीरहेका छन् । यो गीतसँगै धेरैको दिमागमा एउटै नाम आउँछ , आरजु राणा देउवा ।
एक वर्ष अघि १० फेबु्रअरी २०२४ मा द प्रिन्स यादवको युट्युब च्यानलबाट यो गुलाबी सरर बोलको उत्तराखण्डको गीत सार्वजनिक भएको थियो । नेपालमा विरलै सुनिने र हेरिने उत्तराखण्डको यो गीत भने नेपालमा समेत भाइरल बन्यो ।
र यो गीत नेपालमा भाइरल बनाउने काम भने कांग्रेस नेतृ तथा पूर्वप्रधानमन्त्री शेरबहादुर देउवाकी पत्नी , निवर्तमान परराष्ट्र मन्त्री आरजु राणा देउवाको एउटा छोटो नृत्यले गर्याे । गीत सार्वजनिक भएकै समयमा आरजु देउवाले डान्स गरेको भिडियो सामाजिक सञ्जालमा भाइरल बन्न पुग्यो ।
आरजु र कांग्रेस सभापति शेरबहादुर देउवाका एक्ला छोरा जयवीर र कभर गायिका शिवाना श्रेष्ठबीचको विवाहको पूर्वसन्ध्यामा आयोजित जमघटमा आरजुले यो गीतमा ठुम्का लगाएकी थिइन ।
उक्त हिट गीतसँगै अन्य केही गीतमा समेत आरजुसहितका सहभागीले छमछमी नाचेको देख्न सकिन्थ्यो । तर पनि अन्य गीतका नृत्य छाडेर सामाजिक सञ्जाल प्रयोगकर्ताले आरजुले नाचेको गुलाबी सररको भिडियो सेयर गर्दै उनको नृत्यकलाको प्रशंसा गरे ।
यो भिडियोलाई धेरैले नेताहरुको विलासिताको उदाहणका रुपमा समेत प्रस्तुत गरे । खासगरी आकर्षक डान्स स्टेपमा आरजुले नाचेकी छन् । सोल्टी होटलमा आयोजित उक्त जमघटमा आरजुले नाच्दै रमाइलो पनि गरेकी थिइन् ।
फेसबुक र इन्स्टाग्रामको रिल्सदेखि टिकटकमा आरजुको नृत्यको यो भिडियो अहिलेसम्म भाइरल बनेको छ । आरजुको यो भिडियो २०८० माघ महिना यता लगातार भाइरल छ । यो गीतमा बनेको बास्तविक म्युजिक भिडियोमा कलाकारहरुले प्रस्तुत गरेको डान्स स्टेप भन्दा आरजुको डान्स स्टेप नै भाइरल बनेका छन् ।
जयवीरको विवाहपछि आरजु मन्त्री बन्दा,जयवीरको नाम जोडिएको हिल्टल होटलको विषय बाहिरिदा, त्यसविरुद्ध जयवीरले जाहेरी दिएपछि पत्रकार दिलभुषण पाठकविरुद्ध जारी भएको पक्राउ पुर्जी होस् या समय समयमा आरजुको नाम जोडिएर आउने नक्कली भुटानी शरणार्थीको भ्रष्टाचार प्रकरणको विषयमा किन नहोस् उनको यो भिडियो र उनकै नक्कल गर्दै सयौं रिल्स र टिकटक भिडियोहरु बनेका छन् ।
विशेषगरी जेनजी युवाहरूले सुरु गरेको ‘नेपो बेबी’ र ‘नेपो किड्स’ अभियानमा आरजुको यो भिडियो अझ बढी प्रयोग भयो । भदौ २४ गते जेनजी आन्दोलनका क्रममा पूर्वप्रधानमन्त्री शेरबहादुर देउवा र आरजुमाथि उनीहरुकै निवासमा भएको आक्रमण र उनीहरुको घरमा भेटिएका पैसाको भिडियो बाहिरिएपछि त झन आरजुको भिडियो र यसलाई नक्कल गर्दै भिडियो बनाउने क्रम अझै बढ्दै गएको छ ।
कतिपयले जेनजी आन्दोलनमा भग्नावशेष भएको उनको बुढानिलकण्डस्थित निवास र यही आन्दोलनको चपेटामा परी आगजनी भएको हिल्टन होटललाई पृष्ठभूमिमा राखेर समेत भिडियोहरु बनाइएका छन् ।
जहाँ आरजुलाई समेत देखाइने गरिएको छ । जसले यस विषयलाई थप व्यङ्ग्यात्मक बनाएको छ। यसरी आरजुको ‘गुलाबी सरर’ नृत्यले नेपालको सामाजिकदेखि राजनीतिक वृत्तसम्म एक अनौठो छाप छोडेको छ।
