४ कार्तिक , काठमाण्डौ ।
इजरायलमा हमासबाट मारिएका विपिन जोशीको अहिले विहान कञ्चनपुरस्थित महाकाली नदीमा अन्त्येष्टि गरिदैछ । हिजो उनको शव घर पुर्याइएको छ। सोमबार साँझ कञ्चनपुरको भीमदत्त नगरपालिका–३ स्थित विपिनको घरमा शव पुयाइउदा सयौँको संख्यामा उपिस्थित आफन्त र स्थानीयले मन थाम्न सकेनन्।
धनगढी उपमहानगरपालिकाले निशुल्क सञ्चालन गरेको ‘महाप्रस्थान बाहन’ बाट काठको बाकस आँगनमा झरेसँगै धेरैजनाको आँखा रसाएका थिए । नगरमा लक्ष्मीपुजा समेत खल्लो भएको थियो ।
विपिनको सकुशल रिहाईका लागि आमासँगै इजरायल र अमेरिका पुगेर अन्तर्राष्ट्रिय समुदायलाई झक्झकाएकी विपिनकी बहिनी भाइटीकाको दुई दिन अघिमात्रै दाइको शव घर आइपुग्दा भक्कानिएकी थिइन ।
आफ्नै आर्शीवाद शिरोपर गरेर इजरायल गएको छोरा कफिनमा फर्किंदा आमा पदमाको भक्कानो फुट्यो । उनले आफूलाई सम्हाल्न सकिरहेकी थिइनन् । डाको छोडेर रुँदारुँदा उनी अर्धचेत भइन् ।
उनलाई पानी छम्किएर शान्त गराउनु परेको थियो । छोराको शव आफ्नै आँगनमा आइपुग्दा बुवा महानान्द भक्कानिए । बहिनी पुष्पा भावविह्ल बनिन् । भीमदत्त नगरपालिका–३ स्थित बिचपुरी मल्किार्जुन टोलमा सन्नटा छायो ।
सोमबार बेलुकी तिहारको रौनकसँगै लक्ष्मीपूजा चलिरँदा कञ्चनपुरको भीमदत्त नगरपालिका–३ भाषीस्थित मालिकार्जुन टोलमा भने सन्नाटा छाएको थियो ।
चरणबद्ध रूपमा हमासको नियन्त्रणमा रहेका बन्धक सकुशल रिहा भए पनि कञ्चनपुरका जोशीको भने शव बाकसमा दुई वर्षपछि आउँदा परिवारसँगै सिङ्गो टोल शोकमय बनेको छ ।
विपिनकी आमा पद्मा र बहिनी पुष्पा विपिनको सकुशल रिहाइका लागि इजरायल, अमेरिकासम्म पुगिन्, तर विपिनको परिवारसँगै सबैतिरबाट रिहाइका लागि भएको प्रयास सार्थक हुन सकेन ।
केही दिनअघि मात्रै हमासले विपिन मारिएको विषय सार्वजनिक गरे पनि सोमबार बिहानसम्म आमा पद्मालाई विपिनको अवस्थाका बारेमा जानकारी दिइएको थिएन । बहिनी पुष्पाले दाइको निधनको खबरले आधिकारिकता पाएपछि घरमा तिहारका लागि तयार पारिएका सयपत्री फूल उखेलेको जोशी परिवारको भनाइ छ ।
’बिहिनी पुष्पा यसपालि भाइटीकामा दाजुसित भेट हुनेछ भन्ने आशामा थिइन्,’ परिवारका सदस्य किशोर जोशीले भने, ’लक्ष्मीपूजाका दिन विपिनको शव आँगनमा आइपुग्दा परिवार शोकमा डुबेको छ ।’
दुई वर्षदेखि विपिन आउने प्रतिक्षामा रहेको जोशी परिवार सम्हालिन सकेका छैन ।सोमबार दिउँसो काठमाडौँ पु¥याइएको विपिनको शव नेपाली सेनाको स्काई ट्रकबाट बेलुकी अबेर धनगढी पु¥याइएको थियो ।
उनको शव परिवारलाई हस्तान्तरण गर्न नेपालस्थित इजरायली दूतावासका पदाधिकारी विपिनको घरसम्म पुगेका किशोरले जानकारी दिए । उनका अनुसार विपिनको अन्तिम दाहसंस्कार आज बिहान महेन्द्रनगरस्थित महाकाली नदीमा गरिनेछ ।
अन्त्येष्टिअघि जोशीको शवयात्रा बिहान ८ बजे भीमदत्त नगरपालिकाबाट सुरु भई महाकाली नदीको भुजेला घाट लगिने छ । इजरायलले पठाएको फरेन्सिक परीक्षणको रिपोर्टमा विपिनको टाउकोमा गोली लागेर मृत्यु भएको उल्लेख गरिएको छ ।
इजरायलको ‘द नेसनल सेन्टर अफ फरेन्सिक मेडिसिन’को उक्त परीक्षण रिपोर्टमा टाउकोमा गोली लागेर मृत्यु भएको उल्लेख गरिएको छ । त्यसैले उनको मृत्युको कारण पत्ता लागिसकेकाले परिवारका सदस्यले पोष्टमार्टम नेपालमा गर्न नपर्ने बताएको परराष्ट्र मन्त्रालय स्रोतले भनाइ छ ।
दुई वर्षअघि सुदूरपश्चिम विश्वविद्यालयको ‘लर्न एन्ड अर्न’ कार्यक्रमअन्तर्गत इजरायल पुगेका विपिन इजरायल पुगेको एक महिनामै हमासको आक्रमणमा परेका थिए । उक्त आक्रमणमा परेर सुदूरपश्चिम विश्वविद्यालयका १० विद्यार्थीको मृत्यु भएको थियो भने विपिनलाई बन्धक बनाइएको थियो ।
इजरायल र हमासबीच युद्धबिराम भएपछि विपिनको मृत्यु भएको पुष्टि भएको थियो । घटनास्थलमै १० जना नेपाली विद्यार्थीको ज्यान जाँदा केही विद्यार्थी घाइते भएका थिए। हमासको नियन्त्रणमा रहेका विपिन भने केही दिन अघिसम्म फर्कने आशा गरिएको थियो।
हिजो इजरायलबाट पठाइएको विपिन जोशीको पार्थिव शरीर काठमाडौंमा अन्तिम श्रद्धाञ्जली अर्पण गरी नेपाली सेनाको स्काइ ट्रकबाट धनगढी विमानस्थल हुँदै कञ्चनपुर पु्याइएको हो ।
विपिनलाई श्रद्धाञ्जली दिँदै प्रधानमन्त्री सुशीला कार्कीले उनी नेपालीको बहादुर छोरा भएको र उनी हाम्राबीच नरहे पनि नेपालीको मनबाट कहिल्ये नहराउने बताएकी थिइन्।
सन् २०२३ मा कृषिविज्ञान अध्ययनका लागि इजरायल गएका उनी हमासको आक्रमणमा घाइते भएका थिए । किब्बुज, आलुमिमा भएको आक्रमण पछि अपहरणमा परेका उनको मृत्यु भइसकेको भनेर इजरायल सरकारले सन् २०२५ अक्टोबर १५ मा पुष्टि गरेको थियो ।
