१३ मंसिर, काठमाण्डौ ।
नेपाल प्रिमियर लिग (एनपीएल)मा आज दुई खेल हुँदै छन् । आजको पहिलो खेलमा पोखरा एभेन्जर्स र लुम्बिनी लायन्स भिड्दै छन् । दुवै टिमलाई प्लेअफ सम्भावना कायम राख्न जितको दबाब छ ।
प्रतियोगितामा तीन खेल खेलेको पोखरा दुई अंकसहित तालिकको छैटौँ स्थानमा छ । चार खेलबाट दुई अंक नै जोडेको लुम्बिनी लायन्स तालिकाको सातौँ स्थानमा छ । कीर्तिपुरस्थित त्रिवि क्रिकेट मैदानमा आजको पहिलो खेल बिहान ११ः१५ बजेदेखि सुरु हुनेछ ।
यसै गरी दोस्रो खेलमा भने साविक विजेता जनकपुर बोल्ट्स र साविक उपविजेता सुदूरपश्चिम रोयल्स आमनेसामने हुदैछन् । दोस्रो संस्करणमा सुदूरपश्चिम आठ अंकसहित तालिकाको शीर्ष स्थानमा छ ।
सुदूरपश्चिमले आफ्नो चार खेलमध्ये चारै खेलमा जित निकालेको छ । तालिकाको पुछारमा रहेको जनकपुर भने जितविहीन छ । यस अघिका तिन खेलमा हार ब्याहोरेको जनकपुर निकै दवावमा छ ।
दोस्रो खेल आज अपराह्न ३ः३० बजेदेखि सुरु हुनेछ । यसै विच संयुक्त अरब इमिरेट्स (यूएई) मा जारी एसीसी पुरुष यू–१९ प्रिमियर कप क्रिकेट प्रतियोगिताको सेमिफाइनलमा नेपालले आज मलेसियासँग खेल्दैछ ।
आजको खेल अजमान मैदानमा बिहान ९ बजेदेखि सुरू हुनेछ । नेपाल समूह ‘ए’ को र मलेसिया समूह ‘डी’ को विजेताका रूपमा सेमिफाइनलमा पुगेका हुन् । समूह चरणको खेलमा नेपालले लगातार दुई जीत हात पार्दै सेमिफाइनलको यात्रा सुरक्षित गरेको छ ।
नेपालले आफ्नो पहिलो खेलमा साउदी अरेबियालाई आठ विकेटले र दोस्रो खेलमा हङ्कङलाई एक सय १९ रनको फराकिलो अन्तरले हराएको थियो । चौध टोलीको सहभागिता रहेको यो प्रतियोगिताबाट तीनवटा टोली आगामी एसीसी यू–१९ एसिया कपमा छनोट हुने जनाएको छ ।
प्रतियोगिताको फाइनलमा पुग्ने दुबै टोली सिधै आगामी एसीसी यू–१९ एसिया कपमा छनोट हुनेछन् । यू–१९ एसिया कप आगामी डिसेम्बरमा यूएईमै हुँदैछ ।
