विराटनगर, असोज २३
लायन्स क्लब अन्तर्राष्ट्रियको आह्वानमा लायन्स क्लव अफ विराटनगर डाइनोले सुनसरीको बराहक्षेत्र नगरपालिका वडा नं. १०, बकुल्लाचापस्थित भगवती आधारभूत विद्यालयमा विविध कार्यक्रम गरेको छ ।
उक्त स्कूलमा लायन्स क्लव डाइनोले विद्यालयकी जेहेन्दार छात्रालाई छात्रवृति र विद्यार्थीहरुलाई टिफिन वितरण एवम् विद्यार्थी तथा अभिभावकहरुकालागि निःशुल्क स्वास्थ्य चेकजाँचको कार्यक्रम गरेको हो ।
आर्थिक अवस्था अत्यन्तै कमजोर भएकी कक्षा ८ मा अध्ययनरत छात्रा लीला बिष्टलाई क्लवले छात्रावृतिस्वरुप नगद पाँचहजार एकसय हस्तान्तरण गरेको लायन्स क्लव डाइनोका सचिव राजन भगतले जानकारी दिए ।
क्लवले विद्यार्थीहरुलाई खाजास्वरुप जुस र विस्कुट पनि खुवाएको थियो । सोहि अवसरमा स्कूलमा अध्ययनरत बालबालिका र उनीहरुका अभिभावक गरी करिव दुईसय जनाको निशुल्क स्वास्थ्य चेकजाँच पनि गराईएको छ ।
विराट मेडिकल कलेज टंकीसिनुवारीका विशेषज्ञ चिकित्सकसहितको टोलीले स्वास्थ्य चेकजाँच गरेको हो । चेकजाँचका क्रममा सामान्य प्रकृतिको रोगको औषधिसमेत निःशुल्क वितरण गरिएको क्लवका पूर्व अध्यक्ष मोहित अग्रवालले जानकारी दिए ।
सो अवसरमा विद्यालय व्यवस्थापन समितिका अध्यक्ष बमबहादुर कट्वाल र विद्यालयका प्रधानाध्यापक गुरुप्रसाद निरौलाले लायन्स क्लव अफ विराटनगर डाइनोले गरेको काम र सेवाको प्रशंसा गर्दै धन्यवाद व्यक्त गरे ।
