काठमाडौँ। सङ्गीत साधक राजु केसी सम्मानित भएका छन् । राष्ट्रिय स्वतन्त्र पार्टी (रास्वपा) का सङ्घीय संसदीय दलका सचेतक प्रकाशचन्द्र परियारले वरिष्ठ सङ्गीत साधक राजु केसीलाई ‘सङ्गीतकार विशेष सम्मान २०८३’ प्रदान गरेका हुन् ।
मङ्गलबार आयोजित विशेष कार्यक्रममा प्रमुख अतिथिका रूपमा सहभागी हुनुभएका सचेतक परियारले सङ्गीत साधना र सिर्जनामार्फत नेपाली कला तथा संस्कृतिको क्षेत्रमा पुर्याएको अतुलनीय योगदानको कदर गर्दै साधक केसीलाई सम्मानपत्र प्रदान गरेका हुन् ।
कार्यक्रमलाई सम्बोधन गर्दै सचेतक परियारले नेपाली सङ्गीत क्षेत्रका साधक तथा स्रष्टाहरूको अधिकार, हकहित र राज्यबाट पाउनुपर्ने उचित सम्मान सुनिश्चित गर्न ऐन–कानुन निर्माण तथा नीतिगत तहमा आफूले निरन्तर पहल गर्ने प्रतिबद्धता व्यक्त गरे । उनले स्रष्टा तथा सर्जकका सिर्जनाको संरक्षण र अभिलेखीकरणमा जोड दिँदै कला, संस्कृति र सङ्गीतको समृद्धिबिना समाजको चेतना र विकास पूर्ण हुन नसक्ने बताए ।
सङ्गीतकार सङ्घ नेपालको आयोजनामा सम्पन्न कार्यक्रम सङ्घका अध्यक्ष अष्ट लामाको अध्यक्षतामा सञ्चालन भएको थियो। कार्यक्रममा सङ्घका पदाधिकारी, सङ्गीतकर्मी तथा विभिन्न विशिष्ट व्यक्तिहरूको उपस्थिति थियो।
