१६ भदौ , काठमाण्डौ ।
विश्वचर्चित अर्जेन्टिनी कप्तान तथा स्टार फुटबलर लियोनल मेसीले राष्ट्रिय टोलीबाट सन्यास लिने घोषणा गरेका छन् । सामाजिक सञ्जालमा एक स्टाटस लेख्दै मेसीले यस्तो घोषणा गरेका हुन् । केही महिनाअघि मात्र विश्वकपको फाइनल खेलेका मेसीले आफूले अर्जेन्टिनाको जर्सीका लागि सधैं सबै कुरा दिएको बताएका छन् ।
पछिल्ला केही वर्षमा टोलीले ठूला उपाधि जित्दा मात्र नभई आफ्नो लामो अन्तर्राष्ट्रिय करियरभरि नै आफूले पूर्ण समर्पणका साथ खेलेको उनको भनाइ छ । मेसीले लेखेका छन्, ‘यो निर्णयले मेरो आत्मालाई दुखाएको छ र अझै दुखिरहेको छ। तर अब यही सही समय हो भन्ने मैले बुझेको छु ।’
उनले राष्ट्रिय टोलीमा आफ्नो यात्रा निकै भावुक रहेको उल्लेख गर्दै आफूले अब दिनुपर्ने केही बाँकी नरहेको बताएका छन् । साथै, नयाँ पुस्ताका प्रतिभाशाली खेलाडीहरू राष्ट्रिय टोलीमा आउँदै गरेकाले उनीहरूलाई अवसर दिनुपर्ने पनि मेसीले बताएका छन् ।
‘म राष्ट्रिय टोलीमा रहेर खेल्न मन पराउँथेँ र सधैँ मन पराइरहनेछु। मैले आफूलाई पूर्ण रूपमा समर्पित गरिसकेको छु। अब मसँग दिनका लागि केही बाँकी छैन,’ उनले भनेका छन् । मेसीले अर्जेन्टिनाका समर्थकलाई विगत २० वर्षदेखि दिएको प्रेमका लागि धन्यवाद दिएका छन्।
अब आफू टोलीको बाहिरबाट समर्थक बनेर अर्जेन्टिनालाई साथ दिने उनले बताएका छन् । उनले परिवार, प्रशिक्षक, सहकर्मी खेलाडी तथा टोलीका पदाधिकारीप्रति पनि आभार व्यक्त गरेका छन् । अर्जेन्टिनाका लागि आफ्ना सहकर्मीहरूसँग मिलेर ‘सपना जस्ता क्षण’ दिन सकेकोमा आफू गर्व महसुस गर्ने मेसीले बताएका छन् ।
मेसीले आफ्नो यो निर्णयबारेको लेखाइ जुलाई २१ मा, फाइनलको दुई दिनपछि तयार पारेको खुलाएका छन् । तर आफ्ना बुबाको निधनपछि आफू राष्ट्रिय टोलीबाट सन्यास लिने निर्णयमा झनै दृढ भएको उनले बताएका छन् । ‘यी शब्द मैले फाइनलको दुई दिनपछि जुलाई २१ मा लेखेको थिएँ। आज, मेरो बुबासँग भएको घटनापछि, म पहिलेभन्दा पनि बढी विश्वस्त छु,’ मेसीले लेखेका छन्।
मेसीले लेखेका छन्, ‘यो निर्णयले मलाई पीडा दिएको छ र अझै पनि गहिरो रूपमा दुखिरहेको छ। तर अब समय आएको मैले बुझेको छु।’ क्लबस्तरमा भने मेसीले मेजर लिग सकर (एमएलएस) क्लब इन्टर मियामीबाट खेलिरहनेछन्। उनले कीर्तिमानी रूपमा ६ वटा विश्वकप खेलेका छन्।
चार वर्षअघि कतारमा भएको विश्वकपमा उत्कृष्ट प्रदर्शन गर्दै अर्जेन्टिनालाई उपाधि जिताएका मेसीले सन् २०१४ मा पनि अर्जेन्टिनालाई विश्वकपको फाइनलसम्म पु¥याएका थिए। यसै वर्षको विश्वकपमा पनि अर्जेन्टिना फाइनल पुगेको थियो, तर अतिरिक्त समयमा स्पेनसँग पराजित भयो।
मेसीलाई उनका देशवासी डिएगो म्याराडोना र ब्राजिलका महान् खेलाडी पेलेसँगै फुटबल इतिहासकै सर्वकालीन महान् खेलाडीका रूपमा लिइन्छ। मेसीले अर्जेन्टिनाको जर्सीका लागि आफूले सधैँ आफ्नो सम्पूर्ण क्षमता लगाएको बताएका छन्।
‘यी पछिल्ला केही वर्षमा हामीले सबै उपाधि जित्दा मात्र होइन, त्यसअघि पनि मैले सधैँ आफ्नो सबैथोक दिएको छु। मैले यो जर्सीका लागि सधैँ लडेँ र मैदानमा आफ्नो सबैथोक छाडेँ, ताकि तपाईंहरूलाई खुसी बनाउन सकूँ र फुटबलमार्फत अर्जेन्टिनी भएकोमा गर्व महसुस गराउन सकूँ,’ उनले लेखेका छन्।
मेसीले अर्जेन्टिनाका लागि २०७ खेल खेलेर १२५ गोल गरेका छन्। उनी अर्जेन्टिनाका सर्वाधिक गोलकर्ता हुन्। विश्वकपमा मात्रै उनले २१ गोल गरेका छन्। पुरुष अन्तर्राष्ट्रिय फुटबलमा उनीभन्दा बढी गोल गर्ने एकमात्र खेलाडी उनका लामो समयदेखिका प्रतिद्वन्द्वी क्रिस्टियानो रोनाल्डो हुन्।
रोनाल्डोले १४६ अन्तर्राष्ट्रिय गोल गरेका छन् र पोर्चुगलबाट सन्यासको घोषणा भने गरेका छैनन्। हालै अमेरिका, मेक्सिको र क्यानडामा सम्पन्न विश्वकपमा मेसी केही समयका लागि विश्वकपका सर्वाधिक गोलकर्ता बनेका थिए। तर अन्ततः उनी फ्रान्सका किलियन एमबाप्पेभन्दा एक गोल पछाडि रहे।
मेसीले आफ्नो सन्याससम्बन्धी पत्र जुलाई २१ मै लेखेको भए पनि तत्काल सार्वजनिक नगरेको बताएका छन्। विश्वकप फाइनलको दुई दिनपछि लेखिएको उक्त पत्र आफ्ना बुबाको स्वास्थ्य अवस्थाका कारण सार्वजनिक गर्न ढिलाइ भएको उनले बताए। उनका बुबा जर्ज मेसीको अगस्ट ८ मा अर्जेन्टिनाको रोजारियोमा निधन भएको थियो।
सन् २००५ को विश्व यू–२० च्याम्पियनसिपको फाइनलमा अर्जेन्टिनाका दुवै गोल गर्दै टोलीलाई उपाधि दिलाएको दुई महिनापछि मेसीले १८ वर्षको उमेरमा सिनियर राष्ट्रिय टोलीमा डेब्यु गरेका थिए। हंगेरीविरुद्ध बुडापेस्टमा भएको उक्त खेलमा उनको मैदानमा रहने समय जम्मा दुई मिनेट थियो र उनी रातो कार्ड पाएर बाहिरिएका थिए।
राष्ट्रिय टोलीसँगको मेसीको यात्रा सधैँ सहज भने रहेन। सन् २०१६ मा लगातार तीन ठूला प्रतियोगिताको फाइनलमा पराजित भएपछि उनले केही समयका लागि अर्जेन्टिनाको राष्ट्रिय टोलीबाट सन्याससमेत लिएका थिए। तर त्यसपछि उनले सन् २०२१ र २०२४ मा कोपा अमेरिका तथा २०२२ मा विश्वकप जिताउँदै अर्जेन्टिनालाई ऐतिहासिक सफलता दिलाए।
‘विगत २० वर्षमा दिनुभएको सबै प्रेमका लागि धन्यवाद। अब म टोलीभित्रबाट तपाईंहरूको आवाज सुन्न निकै सम्झनेछु। अब म तपाईंहरूमध्ये एक हुनेछु र बाहिरबाट सुख–दुःखमा अर्जेन्टिनालाई समर्थन र हौसला दिनेछु,’ मेसीले भनेका छन्।
मेसीले आफूले क्लबस्तरमा अझै कति समय खेल्ने भन्नेबारे भने केही खुलाएका छैनन्। हालैको विश्वकपमा पनि उनले आफू अझै विश्वकै उत्कृष्ट खेलाडीमध्ये एक रहेको प्रमाणित गरेका थिए। त्यसअघि सप्ताहन्तमा इन्टर मियामीका लागि उनले सीएफ मोन्ट्रियलविरुद्ध ७–१ को जितमा चार गोलसमेत गरेका थिए।
मेसीले भनेका छन्, ‘म शान्त मन र गर्वका साथ बिदा हुँदैछु। मेरा सहकर्मीहरूसँग मिलेर तपाईंहरूलाई ती क्षण दिन सकेँ, जुन हामीले कुनै समय केवल सपनामा मात्र देखेका थियौँ। तपाईंहरूसँग यी क्षणहरू अनुभव गर्नु अविश्वसनीय थियो। म तपाईंहरू सबैलाई माया गर्छु।’
मेसीको सन्यास घोषणापछि विश्वभरबाट प्रतिक्रिया आएको छ। अर्जेन्टिनाका राष्ट्रपति जेभियर माइलेईले सामाजिक सञ्जालमा लेखेका छन्, ‘धेरै–धेरै धन्यवाद, असम्भव मानिस।’ फिफा अध्यक्ष जियानी इन्फान्टिनोले मेसीको असाधारण अन्तर्राष्ट्रिय करियरको प्रशंसा गर्दै उनको प्रतिभा र विनम्रताले लाखौँ मानिसलाई प्रेरित गरेको बताएका छन्।
उनले मेसीको योगदानलाई सदैव स्मरण गरिने उल्लेख गरेका छन्। अर्जेन्टिना फुटबल संघले भनेको छ, ‘सबै कुराका लागि धन्यवाद, लियो। अर्जेन्टिनाको प्रतिनिधित्व गरेकोमा धन्यवाद। हामीलाई सपना देखाएकोमा धन्यवाद। धेरै सपनालाई वास्तविकतामा परिणत गरेकोमा धन्यवाद। यो किंवदन्ती सधैँ तपाईंको हुनेछ।’
अर्जेन्टिना तथा इन्टर मियामीका सहकर्मी रोड्रिगो डी पाउलले मेसीको देशप्रतिको निस्वार्थ प्रेम, हार नमान्ने संघर्ष, अन्याय सहेर पनि अघि बढ्ने क्षमता तथा नेतृत्वको प्रशंसा गरेका छन्। अर्जेन्टिनाका अर्का खेलाडी लिएन्ड्रो परेडेसले मेसीलाई ‘सर्वकालीन महान् खेलाडी’ भन्दै धन्यवाद दिएका छन्।
डिफेन्डर क्रिस्टियन रोमेरोले पनि मेसीप्रति प्रेम, सम्मान र कृतज्ञता व्यक्त गर्दै देश र आफ्नो जीवनमा पारेको प्रभावका लागि धन्यवाद दिएका छन्। मेसीले अर्जेन्टिनाका लागि करिब दुई दशकभन्दा लामो अन्तर्राष्ट्रिय करियरमा विश्वकप, कोपा अमेरिका लगायतका महत्वपूर्ण उपाधि जिताएका छन्। उनको सन्याससँगै अर्जेन्टिनाको राष्ट्रिय टोलीमा एउटा ऐतिहासिक युगको अन्त्य भएको छ।
