काठमाडाैं। परराष्ट्रमन्त्री शिशिर खनाल र पाकिस्तानका उपप्रधानमन्त्री तथा परराष्ट्रमन्त्री सिनेटर मोहम्मद इशाक दारबीच संयुक्त राष्ट्रसंघको मुख्यालय, न्युयोर्कमा द्विपक्षीय भेटवार्ता भएको छ। संयुक्त राष्ट्रसंघको ८१औँ महासभाको उच्चस्तरीय सत्रका अवसरमा भएको भेटवार्तामा नेपाल–पाकिस्तानबीच रहँदै आएको सौहार्दपूर्ण तथा सहयोगात्मक सम्बन्धका विभिन्न पक्षबारे विचार आदानप्रदान भएको थियो।
भेटवार्तामा दुवै पक्षले नेपाल–पाकिस्तान सम्बन्धलाई आगामी दिनमा थप सुदृढ गर्दै पारस्परिक हितका क्षेत्रमा सहयोग विस्तार गर्नुपर्नेमा जोड दिएका छन्। साथै, द्विपक्षीयसँगै बहुपक्षीय तहमा समेत सहकार्यलाई थप प्रभावकारी बनाउने विषयमा छलफल भएको थियो।
विशेषगरी दक्षिण एसियाली क्षेत्रीय सहयोग संगठन (सार्क) तथा संयुक्त राष्ट्रसंघलगायत बहुपक्षीय मञ्चमा नेपाल र पाकिस्तानबीचको सहकार्यलाई थप सुदृढ बनाउने विषयमा दुवै पक्षले जोड दिएका छन्।
