विराटनगर, कार्तिक ११
मञ्जिना क्रिएसन मुभिज प्रालिको आयोजनामा हुन लागेको दोस्रो मिस नेवा कोशी प्रतियोगिताको विभिन्न राउण्ड सम्पन्न भएका छन् । प्रतियोगितामा विभिन्न राउण्ड पार गर्दै १३ जना युवती फाइनलमा प्रवेश गरिसकेका छन् ।
फाइनलमा प्रवेश गरेका प्रतिस्पर्धीहरुको आइतबार विराटनगरमा ट्यालेन्ट राउण्ड सम्पन्न भएको छ । जसमा प्रतिस्पर्धीहरुले चित्रकला, वक्तृत्वकला, नृत्य, गीत, कवितालगायत प्रस्तुत गरेका थिए ।
प्रतियोगितामा कवि एवं पत्रकार मीनकुमार नवोदित, प्याब्सन विराटनगरका सचिव अर्जुन श्रेष्ठ, गायक दीपेन थापा, नृत्य निर्देशक समीक्षा कार्की र अनुराग श्रेष्ठले निर्णायकको भूमिका निर्वाह गरेका थिए ।
फाइनलमा प्रवेश गरेका प्रतिस्पर्धीहरुलाई नेवारी भाषा, नृत्य, गायन, व्यक्तित्व विकासलगायत प्रशिक्षण दिइरहेको मुभिजका प्रबन्ध निर्देशक जतिन ताम्राकारले जानकारी दिए । यही कात्तिक १७ गते शनिबार प्रतियोगिताको फाइनल हुँदैछ ।
