कतार, कात्तिक १४
नेपाल र कतारबीच सहमति र समझदारी सम्बन्धी छुट्टाछुट्टै दुई पत्रमा हस्ताक्षर भएको छ । चार दिनको भ्रमणका लागि कतार पुगेकी राष्ट्रपति विद्या देवी भण्डारीको भ्रमणको दोस्रो दिन मंगलबार उक्त पत्रहरुमा हस्ताक्षर भएको हो ।
नेपाल र कतारबीच कूटनीतिक, सरकारी र विशेष राहादानी बाहकलाई प्रवेशआज्ञाविना आवाजजावतको सहजीकरण गर्ने विषयमा सहमति भएको छ ।
सो सहमतिपत्रमा नेपालकातर्फबाट परराष्ट्रमन्त्री प्रदीपकुमार ज्ञवाली र कतारका तर्फबाट उपप्रधान तथा विदेश मन्त्री शेख मोहम्मद अब्दुल रहमान अल थानीले हस्ताक्षर गरेका छन् ।
त्यसैगरी कृषि तथा खाद्य सुरक्षामा दुई देशबीच सहयोग आदानप्रदान सम्बन्धी अर्को समझदारीपत्रमा हस्ताक्षर भएको छ । सो समझदारीपत्रमा नेपालकातर्फबाट परराष्ट्रमन्त्री ज्ञवाली र कतारका तर्फबाट वातावरण तथा नगरपालिका सम्बन्धी मन्त्री मोहम्मद बिल अब्दुल्ला अलले हस्ताक्षर गरेका हुन् ।
कतारले राष्ट्रपति भण्डारीलाई पहिलो कार्यकालमै निम्तो दिए पनि युएई भ्रमणको एक वर्षपछि आफ्नो दोस्रो कार्यकालमा बल्ल कतारको भ्रमण गरेकी हुन् ।
भण्डारीले मंगलबार अमिर शेख अलथानीसँग द्विपक्षीय भेटवार्ता गरेकी छिन् ।राष्ट्रपति भण्डारीको सम्मानमा आमिर शेखले द्वीपक्षीय भेटवार्तापछि दिवाभोज आयोजना गरेका थिए ।
त्यस्तै राष्ट्रपति भण्डारीले त्यहाँ रहँदा त्यहाँका व्यवसायिक समुदायले आयोजना गर्ने ‘नेपालमा व्यवसाय तथा लगानीको अवसर’ विषयक संयुक्त अन्तक्र्रिया कार्यक्रमलाई मंगलबार नै सम्बोधन गरेकी छिन् । उनले त्यहाँ कतारी उद्योगलाई नेपालमा लगानी गर्न आग्रह गरिन् ।
उनको सम्मानमा कतारका लागि नेपाली राजदुत रमेशप्रसाद कोइरालाले रात्रीभोजको आयोजना गरेको परराष्ट्र मन्त्रालयले जनाएको छ।
राष्ट्रपति भण्डारीको भ्रमण टोलीमा परराष्ट्रमन्त्री प्रदीपकुमार ज्ञवाली, परराष्ट्र सचिव शंकरदास बैरागीसहितका उच्च अधिकारीहरु सहभागी छन् । भ्रमण दलमा उद्योगी तथा व्यवसायिक प्रतिनिधिहरुसमेत सहभागी छन् । राष्ट्रपति भण्डारी चार दिने भ्रमण सकेर कात्तिक १५ गते स्वदेश फर्किने छिन्।
गणतन्त्र स्थापनापछि कतारमा हुन लागेको यो दोस्रो उच्चस्तरीय भ्रमण हो। यसअघि पहिलो पटक नेपालका प्रथम राष्ट्रपति डा. रामवरण यादवले समेत कतारको भ्रमण गरेका थिए।
