झापा, कात्तिक २७
मेची नदीमा छठ मनाउन पूजा स्थलतर्फ गइरहेकी एक बालिकाको ट्याक्टरले किचेर मृत्यु भएको छ । मृत्यु हुनेमा भद्रपुर नगरपालिका ५ पोखरीटोल निवासी राखी यादवकी ६ बर्षीया छोरी राशी यादव रहेको वडा प्रहरी कार्यालय भद्रपुरका प्रहरी निरीक्षक प्रकाश जवेगूले जानकारी दिए ।
मेची नदीमा परिवारसंग छठ मनाउनका लागि राशीसहित उनका परिवार मे १ त ५२३२ नम्बरको ट्याक्टर चढेर पूजा स्थलतर्फ गइरहेका थिए । ट्याक्टरको अगाडि पट्टीको सिटमा बसेकी राशी टयाक्टरबाट खसेपछि उनलाई टयाक्टरको अगाडिको चक्काले किचेको थियो ।
टयाक्टरले किचेर गम्भीर घाइते भएकी उनको मेची अञ्चल अस्पताल भद्रपुरमा उपचारकै क्रममा मृत्यु भएको प्रहरी निरीक्षक जवेगुले बताए । प्रहरीले टयाक्टर चालक बन्धन उराउलाई नियन्त्रणमा लिएको छ ।
