काठमाडौँ , मंसिर २
रसिदका भरमा गाडी र मोटरसाइकल चलाइरहेका चालकले तत्काल स्मार्ट लाइसेन्स नपाउने भएका छन् । डेढ महिनामा ५ लाख लाइसेन्स छपाइ गर्ने दाबी गर्दै छपाइको जिम्मा दिए पनि निजी कम्पनीले १ महिनामा ६० हजार मात्र लाइसेन्स छापेको छ ।
यातायात व्यवस्था विभागले मात्र छाप्न नपुगेको भन्दै निजी कम्पनी मालिका इनकर्पोरेट लिमिटेडलेस्मार्ट लाइसेन्स छपाइ गर्ने जिम्मा दिएको हो । स्मार्ट लाइसेन्स पर्याप्त छपाई नहुँदा ५ लाखभन्दा धेरैले रसिद लिएर गाडी र मोटरसाइकल चलाइरेका छन् ।
झण्डै १ वर्षदेखि स्मार्ट लाइसेन्स माग अनुसार वितरण हुन सकेको छैन । विभागका सूचना अधिकारी गोकर्णप्रसाद उपाध्यायले बीचमा प्राविधिक गडबढीका कारण मालिकाले सोचेअनुसार काम गर्न नसकेको बताए ।
विभागले दैनिक २५ सयको हाराहारीमा नयाँ लाइसेन्स छापिरहेको छ ।एक दिनमा झण्डै ८ हजार लाइसेन्स छाप्ने क्षमताको प्रिन्टर ल्याउने तयारी गरिरहेकाले पनि अबको एक महिनामा अहिले चीटको भरमा गाडी गुडाइरहेका सबैले स्मार्ट लाइसेन्स पाउने उनले दाबी गरे । दैनिक नयाँ र पुराना गरी ६ हजार भन्दा धेरै लाइसेन्सको माग हुने गरेको छ ।
