काठमाडौं,पुस ११
सन् २०१८ नेपाली क्रिकेटका लागि एक ऐतिहासिक र सफल बर्षका रुपमा सकिँदैछ । डिभिजन २ बाट सुरु भएको नेपालको यात्रा वान डे अन्तर्राष्ट्रियमा डेब्यूसम्म पुग्यो ।
टोलीका रुपमा त नेपाल सफल भयो नै युवा स्पिनर सन्दीप लामिछानेको आईपीएल देखी बिग ब्यास सम्मको अन्तर्राष्ट्रिय व्यवसायिक यात्राले पनि नेपाली क्रिकेट जगतलाई विशेष क्षण दियो । दुर्भाग्यवश नेपाल क्रिकेट संघ ( क्यान) आईसीसीलेको निलम्बनबाट यस वर्ष पनि फुकुवा हुन सकेन । नामिबियामा फेब्रुअरीबाट डिभिजन २ प्रतियोगिता खेल्दै सन् २०१८ को सुरुवात गरेको नेपालले अक्टोबारमा मलेसियामा सम्पन्न आईसीसी विश्व टी–२० एसिया ‘बी’ को च्याम्पियन हुँदै समाप्त गर्यो ।
समग्रमा २०१८ मा नेपाली क्रिकेट टिमका ५ उत्कृष्ट क्षण यस्ता रहे:
क्यानडाविरुद्ध नाटकीय जित
सन् २०१८ को फेब्रुअरीमा आईसीसी डिभिजन २ नामिबियामा चलिरहेको थियो । नेपालसहित यूएई, क्यानडा, नामिबिया, केन्या र ओमान सहभागि रहेको प्रतियोगिताको शीर्ष दुई टोली जिम्बाबेमा हुने विश्वकप छनोट खेल्न पाउँथे । आईसीसी विश्व क्रिकेट च्याम्पियनसिप लिग २०१५–१७ मा शीर्ष चारमा पर्न नसकेपछि घटुवा हुँदै नेपाल डिभिजन २ मा पुगेको थियो ।
नेपालले सुरुवाती चार खेलमा ३ मा जित र १ मा हार बेहोरेपछि क्यानडासँगको खेलनै अघिल्लो चरण निर्णायक हुने अवस्थामा पुग्यो । क्यानडासँग हारे नेपाल डिभिजन २ मा रहेर चार वर्ष अन्तर्राष्ट्रिय क्रिकेट अन्धकारतर्फ धकेलिने निश्चित थियो । जुन मार्गमा नेपाल जान चाहाँदैनथ्यो । गर वा मर अवस्थामा टस हारेर ब्याटिङ्ग थालेको क्यानडाले निर्धारित ५० ओभरमा ८ विकेटको क्षतिमा १ सय ९४ रन बनाउन सक्यो । १ सय ९५ रनको विजयी लक्ष्य पक्ष्याएको नेपाल ४३ ओभमा १ सय ४४ रन बनाउँदा ९ विकेट गुमाएर हारनजिक पुग्यो । जुन अवस्थामा नेपाललाई जितको लागि ५१ रन आवश्यक थियो ।
अन्तिम विकेटका रुपमा क्रिजमा करण केसी र सन्दीप लामिछाने थिए । दुवै बलर भएकोलेपनि उक्त लक्ष्य पुरा गर्नेमा कुनै आसा थिएन । स्वदेश तथा विदेशमा रहेका सम्पूर्ण फ्यान, शुभचिन्तकले मात्र होइन ड्रेसिङ रुममा रहेका खेलाडी र प्रशिक्षकले पनि जितको आसा मारिसकेका थिए । बाउन्ड्री (चौका) लाइन भन्दा बाहिर क्यानडाका खेलाडी जितको खुसि मनाउन सुरु गरिसकेका थिए ।
तर करणले जादुमय नाटकीय ब्याटिङ गर्दै नेपाललाई अन्तिम बलमा एक विकेटको सनसनिपूर्ण जित दिलाए र जिम्बाबेमा हुने विश्वकप छनोटको लागि टिकट पनि पक्का गरे । २०१८ मात्र नभएर सधैं भरी यो नतिजा अविस्मरणीय र विश्व क्रिकेटमा पनि उदाहरणीय बनिरहने छ ।
वान डे मान्यता
डिभिजन २ मा शीर्षस्थानमा रहेर एकदिवसिय विश्वकप खेल्न नेपाल मार्चमा जिम्बाबे भ्रमणमा निस्कीयो । छनोट खेल्न जाने जो कोहि टिमको सपना विश्वकप खेल्ने हुन्छ तर नेपालको उद्देश्य विश्वकप नभएर वान डे अन्तर्राष्ट्रिय (ओडीआई) मान्यता प्राप्त गर्नु थियो । नेपाली क्रिकेटलाई थुप्रै सुनौला अवसर प्राप्त गर्न जसरी पनि खेलाडी ओडीआई मान्यता दिलाउने सोचमा थिए । १० देश सहभागीता रहेको उक्त प्रतियोगिताबाट शीर्ष दुई टोली इंग्ल्यान्डमा हुने वान डे विश्वकप खेल्न पाउँथे ।
वेस्ट इन्डिज, जिम्बाबे, अफगानिस्तान र आयरल्यान्ड जस्ता टेस्ट राष्ट्रका अगाडी नेपाल विश्वकप खेल्छ भन्नु पनि एकादेशको कथा जस्तै थियो । पहिलो खेलमै नेपाल जिम्बाबेसँग १ सय १६ रनले पराजित भयो । स्टकल्यान्डसँग ४ र अफगानिस्तानसँग ६ विकेटले पराजित भएपछि नेपालको अघिल्लो चरणको ढोका लगभग बन्द भईसकेको थियो । सास हुन सम्म आस राख्नु भने जस्तै हङकङले नाटकीय रुपमा अफगानिस्तानलाई ३० रनले हराएपछि नेपालको झिनो अंक गणितीय आसा पुन पलायो ।
अन्तिम खेलमा हङकङलाई फराकिलो अन्तरले पराजित गर्न सके नेपालको सुपर सिक्सको झिनो अंक गाणितीय संभावना कायमै देखिन्थ्यो । फराकिलो जित निकाल्न नसकेपनि ५ विकेटले पराजित गर्दै वान डे मान्यताको आसा भने कायमै राख्यो । नेपालको जितले अफगानिस्तानको भाग्य चम्कियो र सुपर सिक्समा प्रवेश गर्यो । प्ले अफमा पप्पुवान्युगिलाई पराजित गरे र उता नेदरल्यान्डले हङकङलाई हराए नेपालले सोझै चार वर्षको लागि वानडे मान्यता पाउथ्यो । नतिजा पनि नेपालकै पक्षमा आयो ।
नेपालले पपुवा न्यू गिनीलाई ६ विकेटले हराउँदा हङकङ नेदरल्यान्डसँग ४४ रनले पराजित भयो र नेपालले मार्च १५ मा पहिलो पटक चार वर्षको लागि वान डे मान्यता प्राप्त गर्दै इतिहास रच्न सफल भयो । इतिहास मात्र होइन नेपालको सपना पनि पुरा भयो । सन् २०१८ मार्च १५ नेपाली क्रिकेटको लागि यस वर्षको लागि सबै भन्दाबढि खुसी र अविस्मरणीय क्षण हो । यद्यपी क्यान आईसीसीको निलम्बनमा रहेको अवस्थामा नेपालले वान डे मान्यता कतिसम्म सदुपयोग गर्न सक्छ भन्ने चिन्ता थपिएको छ ।
रोमांचक ओडीआई सिरिज डेब्यू
मार्चमा वान डे मान्यता पाएको नेपालको डेब्यू भने अगस्ट १ मा नेदरल्यान्डसँग गर्यो । डेब्यू खेलमै नेपाल ५५ रनले पराजित भयो । १ सय ९० रनको लक्ष्य पक्ष्याएको नेपाल १ सय ३४ रनमा समेटियो । अगस्ट ३ मा भने दोस्रो तथा अन्तिम खेलमा नेदरल्यान्डमाथि १ रनको रोमान्चक जित निकाल्दै पहिलो वान डे जित आत्मसात गर्न सफल भयो । टस जितेर पहिला ब्याटिङ थालेको नेपालले पारस खड्का ५१ र सोमपाल कामीले ६१ रन बनाएपछि निर्धारित ५० ओभरमा २ सय १६ रन बनाउदै नेदरल्यान्डसामु मध्यम लक्ष्य प्रस्तुत गरेको थियो ।
जवाफमा २ सय १७ रनको लक्ष्य पक्ष्याएको नेदरल्यान्ड्सलाई ५० ओभरमा २ सय १५ रनमा रोक्दै नेपालले रोमान्चक जित निकालेको थियो । अन्तिम ओभरमा ६ रन चाहिँएको अवस्थामा कप्तान पारस खड्काले ५ रन खर्चेर फ्रेड क्लासेनलाई अन्तिम बलमा रन आउट गर्दै जित दिलाए । जुन २०१८ मा नेपाली क्रिकेटका लागि उत्कृष्ट क्षण हो ।
लर्ड्समा नेपाल, एमसीसी र नेदरल्यान्डबीचको त्रिकोणात्मक टी-२० श्रृंखला
जो कोही क्रिकेट खेलाडीलाई पनि लर्ड्समा खेल्ने इच्छा र सपना हुन्छ । त्यसमा पनि एसोसिएट राष्ट्र र खेलाडीले लर्ड्समा बिरलै मात्र खेल्न पाउछन् । हुन त नेपालका लागि लर्ड्स नौलो भने थिएन । सन् २०१६ मा नेपालले पहिलो पटक लर्ड्समा खेलिसकेको थियो । जुलाई २९ मा वर्षाले प्रभावित खेलमा नेपाल र एमसीसीबीचको खेल ६ ओभरमा झारियो । उक्त खेलमा नेपालले एमसीसीलाई ९ विकेटल पराजित गर्यो ।
दोस्रो खेलमा टस हारेर पहिला ब्याटिङ थालेको नेदरल्यान्डले १६.४ ओभरमा १ सय ७४ रन बनाउन ४ विकेट गुमाएको अवस्थामा वर्षा खेल रोकियो । लामो समयको प्रतिक्षा र फेरी खेल सुरु हुन लागेको बेला पानी पर्न थालेपछि खेल रद्द भएको थियो । खेल वर्षाले प्रभावित बनेपनि नेपाली क्रिकेट, खेलाडी, समर्थक र शुभचिन्तकलाई भने २०१८ यो श्रृंखला ऐतिहासिक क्षण बन्न पुग्यो ।
आईसीसी विश्व टी-२० एसिया क्षेत्र छनोट ‘बी’ च्याम्पियन
उपाधि भनेको उपाधि नै हो । चाहे त्यो सानो होस वा ठूलो । २०१८ अक्टोबरमा नेपालले अन्तर्राष्ट्रिय स्तरमा जितेको उपाधिनै आईसीसी वोल्ड टी २० एसिया रिजन क्यालिफायर बी हो । तुलानात्मक रुपमा नेपालले क्रिकेट खेल्ने भन्दापनि सिकाउने जस्ता देशसँग प्रतिस्पर्धा गरेको प्रतियोगितामा सिंगापुर, मलेसिया, भुटान, म्यानमार, चीन र थाइल्यान्डलाई पछि पार्दै च्याम्पियन बनेको थियो ।
प्रतिस्पर्धी टोली अनुसार नेपालले उपाधि जित्नु कुनै ठूलो कुरा भने थिएन । सन् २०२० मा अष्ट्रेलियामा हुने विश्वकपको पहिलो खुड्किलोको रुपमा हेरिएको उक्त प्रतियोगिता जित्दै २०१८ को अन्त्य गर्नु नेपाली क्रिकेटको लागि २०१८ को सुखद बिदाई रहयो ।(हाम्रो खेलकुद)
