विराटनगर : २५ लाख रुपैँयाको चिठ्ठा परेको छ भनि इमोबाट ठगी गरेको आरोपमा मोरङ प्रहरीले चार जनालाई पक्राउ गरेको छ । बारा जिल्लाको बरा प्रसौनी गाउँपालिका–६ बेलहीका सखिना खातुनलाई एनसेल कम्पनीको चिठ्ठा परेको र उक्त रकम प्राप्त गर्न पैसा पठाउनुपर्छ भन्दै ३० हजार रुपैँया ठगी गर्ने चार जनालाई प्रहरीले पक्राउ गरी शुक्रबार सार्वजनिक गरेको हो ।, यो समाचार आजको उद्घोष दैनिकमा छापिएको छ ।
पक्राउ पर्नेमा मोरङको कटहरी गाउँपालिका– ३ का ३४ वर्षीय मन्जयकुमार सिंह, शत्रुधनकुमार तत्मा, २६ वर्षीय श्रवण मल्लाह र जहदा गाउँपालिका–४ का २१ वर्षीय अजयकुमार सिंह रहेका छन् । उनीहरुमध्ये मञ्जयकुमारले सखिनालाई इमोबाट फोन गरी चिठ्ठा बापतको रकम लिन सुरुमा ३० हजार मागेपछि उनले आईएमइबाट पठाईदिएकी थिइन् ।
उक्त रकम विराटनगर महानगरपालिका– ७ हाटखोला स्थित लक्ष्मी मनी ट्रान्सफरबाट मञ्जयकुमारसहितले निकालेर पुन ः ७५ हजार रुपैँया माग गरेका थिए ।थप रकम मागिएपछि आफु ठगिएको थाहा पाएकी सखिना र उनका आफन्तले जिल्ला प्रहरी कार्यालय बारामा उजुरी दिएका थिए ।
