तेह्रथुम, पुस १६,
तेह्रथुमको मेन्छ्यायेम गाउँपालिकामा केन्द्र कहाँ राख्ने भन्ने विषयमा जनप्रतिनिधिबीच विवाद भएको छ । केन्द्र विवादकै कारण आर्थिक वर्ष सकिन लाग्दा समेत गाउँ सभा हुन सकेको छैन ।
गाउँपालिकाले निर्णय लिनुपर्ने महत्वपूर्ण विषयसमेत विवादका कारण रोकिएको छ । साविकको मोराहाङ, श्रीजुङ र पौठाक गाउँ विकास समितिलाई मिलाएर गठन भएको मेन्छ्यायेम गाउँपालिकाको केन्द्र मोराहाङ बजार तोकिएको थियो ।
तर, मोराहाङ बजार सबैलाई पायक नपर्ने भन्दै केन्द्र सार्ने या नसार्ने भन्नेमा जनप्रतिनिधिबीच विवाद भएको हो ।
६ वडा रहेको गाउँपालिकामा दुई वडाध्यक्षसहित गाउँपालिका अध्यक्ष जितेको नेकपा एमाले मोराहाङ बजारमै हुनुपर्ने तथा गाउँपालिका उपाध्यक्ष र चार वडाध्यक्षसहित बहुमत पाएको नेपाली कांग्रेस सबैलाई पायक पर्ने ठाउँमा केन्द्र सार्नुपर्ने पक्षमा रहेका छन् ।
कांग्रेसनिकट जनप्रतिनिधिले श्रीजुङ वा मोराहाङ बजारभन्दा करीब २ किमि टाढाको डाँडामा केन्द्र सार्नुपर्ने माग राखेका छन् । गाउँपालिकाको केन्द्र विवाद र कर्मचारी अभावले गाउँपालिकाको गाउँसभा भने यतिबेला प्रभावित बनेको छ ।
