कठमाडौं, माघ २७
सर्वोच्च अदालतले एनसेल र उसको माउ कम्पनी एक्जिएटाबाटै लाभकर असुल्न परामादेश दिए पनि एक्जिएटाले बाँकी लाभकर तिर्ने दायित्व आफ्नो नभएको भन्दै विज्ञप्ति जारी गरेको छ । उसले ठूला करदाता कार्यालयबाट निर्धारण भएअनुसारको पूरै र अन्तिम भुक्तानी गरिसकेको भन्दै लाभ कर तिर्ने दायित्व आफ्नो नभएको बताएको छ ।
एक्जिएटा समूहले आफूमाथि अब कुनै करको दायित्व नै नभएको दाबी गरेको छ । उसले लाभकर तिर्ने दायित्व कम्पनी बेच्ने समूहकै हुने बताएको छ । आफ्नो वेबसाइटमा जारी गरेको विज्ञप्तिमा एक्जिएटाले भनेको छ– सन् २०१७ जुन ४ तारिखमा ठूला करदाता कार्यालयले एनसेल, रेनोल्ड होल्डिङ्स लिमिटेट र एक्जिएटा युकेलाई कम्पनीको कारोबारका हकमा बिक्रेतामाथि हुने लाभकर भुक्तानीका दायित्व हुने सन्दर्भमा पूरै सफाइ दिइसकेको छ ।
एक्जिएटाले कम्पनी बिक्रेता स्वीडिस कम्पनी टेलिया सोनेरामाथि नै लाभकरको दायित्व रहेको दोर्होयाएको छ । उसले ‘अफसोर’ कारोबारमा लाभकर आकर्षित नहुने, आकर्षित भइहाले पनि त्यो दायित्व विक्रेताकै हुने प्रष्ट पारेको छ ।
यसअघि सर्वोच्च अदालतले एनसेल बिक्री एनसेल बिक्री गर्दा लाग्ने लाभकर एनसेल र एक्जियाटाले नै तिर्नुपर्ने परामदेश जारी गरेको थियो । करिब तीन वर्षअघि महालेखापरीक्षकको कार्यालयले ३५ अर्ब रूपैयाँ बेरूजु उल्लेख गरेकोमा गत वर्ष ठूला करदाता कार्यालयले करिब ६१ अर्ब रूपैयाँ लाभकर निर्धारण गरेको थियो । ब्याज र हर्जानासमेत गरी अहिले करिब ७३ अर्ब पुगेको आंकलन छ ।
