काठमाठौं, माघ २७
आज वसन्त पञ्चमीका अवसरमा काठमाडौँको बसन्तपुरमा बसन्त श्रवण गराइएको छ । हरेक वर्ष माघ शुक्ल पंचमीका दिन राष्ट्रप्रमुखलाई हनुमानढोकाको नासल चोकमा बसन्त श्रवण गराउने चलन छ ।
यसै अवसरमा आज राष्ट्रपति विद्यादेवी भण्डारीले हनुमानढोका पुगी बिहानको शुभसाइतमा वसन्त श्रवण गरेकी छन् । हनुमानढोका दरबार भित्रको नासलचोकमा आयोजित विशेष समारोहमा राष्ट्रपति समक्ष हनुमानढोका हेरचाह अड्डाका मूल पुरोहित देवराज अर्यालले बसन्त कथा श्रवण गराएका थिए ।
राष्ट्रपति संगै उपराष्ट्रपति नन्दबहादुर पुन, प्रधानमन्त्री केपी शर्मा ओली र प्रधानन्यायाधीश चोलेन्द्रशम्शेर राणाले पनि वसन्त श्रवण गरे । बसन्त श्रवण श्रीमद्भागवत महापुराणमा भगवान् श्रीकृष्णको खोजीमा रहेकी राधा र गोपिनीहरु, सखीहरूले कृष्ण भगवाननको आराधना गरेको कथामा आधारित भएको मनिन्छ ।
आजबाट बसन्त ऋतुको आगमन हुने पनि विश्वास गरिन्छ । वसन्त पञ्चमीको दिनदेखि वसन्त ऋतुको शुरुआत हुने र त्यससँगै रुख बिरुवामा नयाँ पालुवा पलाउने मान्यता पनि रहेको छ । बसन्त कथा श्रवण पछि मूलपुरोहित अर्याललेसबैलाई अभिषेक, टीका, माला र फूलप्रसाद प्रदान गरेका थिए ।
