विराटनगर,फागुन ७
विराटनगर–८ स्थित वडा प्रहरी कार्यालय हाटखोलाको नवनिर्मित कार्यालय भवनको मंगलबार एक समारोहका बीच उद्घाटन गरिएको छ । समुदाय प्रहरी पालिका समिति मोरङको आयोजनामा भएको कार्यक्रममा नवनिर्मित कार्यालय भवनको मोरङका प्रहरी प्रमुख प्रहरी उपरीक्षक (एसपी) मनोजकुमार केसीले उद्घाटन गरे ।
यसअघि व्यवस्थित कार्यालय भवन नहुँदा कार्यसम्पादनमा समस्या हुँदै आएको थियो । वडा प्रहरी कार्यालय प्रमुख राजन पौडेलको सक्रियतामा भवन निर्माण गरिएको हो । कार्यालय भवन निर्माणमा ५ लाख ९२ हजार रुपैयाँ खर्च भएको पौडेलले जानकारी दिए । जसमध्ये ५ लाख ३२ हजार रुपैयाँ विभिन्न दाताबाट संकलन भएको उनले बताए । समारोहमा एसपी केसीले चन्दादाताहरुलाई कदरपत्रले सम्मान गरेका थिए ।
सो अवसरमा एसपी केसीले प्रहरीलाई स्रोत साधनयुक्त बनाउन जनताको सहयोग अपरिहार्य रहेको बताए । उनले लागूऔषध र मदिराको सेवन सुरक्षाको चुनौती रहेको उल्लेख गरे । कार्यक्रममा कटहरी गाउँपालिकाका प्रमुख प्रशासकीय अधिकृत गणेशबहादुर कार्की, वडा सदस्य भारती उपाध्याय, भवन निर्माण समितिका संयोजक विनायक पन्तलगायतले मन्तव्य राखेका थिए ।
