विराटनगर, फागुन १०
शहरबजार, गल्ली, टोलटोलमा अवैध रक्सीको बिगबिगी छ, नगरपालिका, प्रहरी, प्रशासन राजस्व गन्ध सुग्न मस्त छ, लगायतका नाराका साथ शुक्रबार विराटनगरमा प्रदर्शन गरिएको छ । मदिरा व्यवस्थापन अभियानले आयोजना गरेको प्रदर्शनमा सहभागीहरुले विभिन्न नारा छाती टासेर प्रर्दशन गरेको हो ।
चुरोट, खैनी गुटखा र मदिराले क्यान्सर लागि लिन्छ ज्यान जस्ता सचेतना मूलक पर्चा उनीहरुले छातीमा टाँसेका थिए । कार्यक्रममा बोल्दै मदिरा व्यवस्थापन अभियानका अध्यक्ष फडिराज नेपालले मन्दिर, मस्जिद,अस्पताल, विद्यालय तथा सार्वजनिकस्थलमै मदिरा व्यवसाय संचालन रहदा पनि स्थानीय तह , प्रहरी, प्रशासन मौन रहेको बताए ।
उनले वर्तमान अवस्थामा शहर बजार , टोल टोल , गल्लीगल्लीमा जथाभावी मदिरा व्यवसाय संचालन हुदा बेथिती बढेको बताए । मदिराकै कारण नागरिकको स्वास्थ्य तथा सुरक्षा जोखिममा रहेकाले सरकारले मदिरा व्यवस्थापन सम्बन्धी कानुन अबिलम्ब निर्माण गर्नुपर्ने उनले बताए । कार्यक्रममा सहभागिले मदिरा बिक्रीस्थललाई व्यवस्थित गर्न सम्बन्धित निकाय लाग्नु पर्नेमा जोड दिएका थिए ।
