एजेन्सी, फाल्गुन २०
गोलकिपरले रातो कार्ड पाएर १० खेलाडीमा सीमित भएको नापोलीमाथि युभेन्टसले कठिन जित दर्ता गरेको छ इटालियन सिरी ‘ए’अन्तर्गत नेपाली समयअनुसार सोमबार बिहान भएको खेलमा १० खेलाडीमा सीमित युभेन्टसले १० खेलाडीमा झरेको नापोलीलाई उसकै घरमा १–२ ले हराएको हो ।
खेलको २५औं मिनेटमा घरेलु टोली नापोलीका गोलकिपर एलेक्स मेरेटलाई रेफ्रीले रातो कार्ड देखाएर मैदानबाहिर पठाएका थिएए । मेरेटले बक्सबाहिर गएर खुट्टाले बल क्लियर गर्नेक्रममा युभेन्टसका क्रिस्टियानो रोनाल्डोमाथि गम्भीर फउल गरेपछि रेफ्रीले उनलाई सोझै रातो कार्ड दिएर मैदानबाट निकालेका थिए ।
त्यसपछि नापोलीले मैदानका एक खेलाडी सब्सिचयुट गरेर बेन्चमा भएका अर्का गोलकिपर डेभिड ओस्पिनालाई मैदान छिराएको थियो । त्यसपछि रोनाल्डोलाई बक्सबाहिर लडाएकै फउलमा युभेन्टसका लागि मिरेलाम पियानिचले फ्रि किकबाट दर्शनीय गोल गरे । सब्सिच्युट गोलकिपर डेभिडले पियानिचको बल बचाउन कुनै मौका नै पाएनन् । त्यसपछि खेलको ३९औं मिनेटमा युभेन्टसका लागि इम्री च्यानले गोल गर्दै पाहुना टोलीलाई पहिलो हाफमा ०–२ को अग्रता दिलाए । उनले फेडरिक बर्नान्डेचीको लङ पासमा पासमा हेडिङ गोल गरेका थिए ।
दोस्रो हाफमा खेलमा केही नाटकीय दृश्य देखिए । जहाँ पहिलो हाफमा गोल गरेका युभेन्टसका पियानिच दोस्रो हाफमा सुरु भएको २ मिनेटमै रातो कार्ड पाएर मैदानबाट बाहिरिए । उनले दोहोरो पहेंलो कार्ड खाँदै मैदान छाड्नु परेको थियो । त्यसपछि दुवै टोली समान १०–१० खेलाडीमा सीमित भए । त्यसपछि घरेलु टोलीले दोस्रो हाफमा आक्रामक खेल पस्कियो । उसले पटक–पटक युभेन्टसको पोस्टमा आक्रमण गरेर खेलमा फर्किन संघर्ष देखाएको थियो । यता, युभेन्टस भने नापोलीको आक्रमण रोक्नमै व्यस्त देखिन्थ्यो ।
सोहीक्रममा खेलको ६१औं मिनेटमा नापोलीका जोसे कालेजोनले गोल गर्दै खेल १–२ बनाए । त्यसपछि खेलको ८३औं मिनेटमा नापोलीले पेनाल्टी पाएको थियो । बक्समा युभेन्टसका एलेक्स सान्ड्रोले ह्यान्ड बल गरेपछि रेफ्रीले भिएआरबाट नापोलीलाई पेनाल्टीको मौका दिएका थिए ।
तर, पेनाल्टी हान्न आएका नापोलीका लोरेन्जो इन्साइनको पेनाल्टी प्रहार पोलमा लाग्दै फर्किएपछि घरेलु टोलीले खेल बराबरी गर्ने मौका गुमायो । त्यसपछि खेलमा दुवै पक्षबाट थप गोल हुन सकेन । र, खेल युभेन्टसले १–२ ले जित्यो । अब यो जितपछि युभेन्टसले २६ खेलबाट ७२ अंक बनाएको छ । पराजित नापोली समान खेलबाट ५६ अंकसहित दोस्रो स्थानमै खुम्चिएको छ ।
