जनकपुर , फागुन २६
सरकारसंगको ११ बुँदे सहमति पहिलो पटक जनकपुर पुगेका मधेश गठबन्धनका प्रमुख सीके राउतलाई जनकपुरमा उनका कार्यकर्ताहरुले भव्य स्वागत गरेका छन् ।
सरकारसंगको सहमति पछि सामाजिक सञ्जालमा मधेसको बारेमा जनमत संग्रह गर्ने बाटो खुल्यो भनेर अभिव्यक्ति दिएका राउत जनकपुर विमानस्थलबाट बाहिरिदा भने मौन एवं गुपचुप रहेका थिए । तर उनलाई स्वागत गर्न बसेका कार्यकर्ताहरुले भने उनलाई ‘फ्री मधेस’ लेखिएको प्लेकार्ड बोकेर स्वागत गरेका थिए ।
विमानस्थलमा राउतलाई स्वागत गर्न पुगेका उनका कार्यकर्ताले भने नेपालको संविधानको भावना विपरीत ‘फ्री मधेस’ लेखेको व्यानर र प्ले कार्डहरु हातमा बोकेर विभिन्न नारा लगाएका थिए । नेपाल सरकारसंग दुइ दिनअघि भएको ११ बुँदे सम्झौताको विपरित जनकपुर विमानस्थलमा देश विरोधी नारा र गीतहरु गुञ्जिएको थियो । तर स्थानीय प्रशाशन र प्रहरी मूकदर्शक बनेका थिए ।
अपरान्ह ३ः५० बजे बुद्ध एयरको विमानवाट जनकपुर उत्रिएका राउतलाइ भेट्न र प्रतिक्रिया माग्न विमानस्थल पुगेका दुई दर्जन बढी सञ्चारकर्मीलाई राउतका कार्यकर्ताले दुव्र्यवहार समेत गरेका थिए । जनकपुर विमानस्थलमा भेला भएका गठबन्धनका सयौं नेता कार्यकर्ताहरु राउतलाई लिएर जनकपुरको प्रमुख मार्गको परिक्रमा गरेका थिए ।
बिभिन्न गीत घन्काउदै सिरहा, सप्तरी, महोत्तरी र धनुषावाट आएका नेता कार्यकर्ताहरु ट्याक्टर, जीप र मोटर साईकलमा जनकपुर नगरेको परिक्रमा गरेका थिए ।राउतको स्वागतपछि परिक्रमामा २ सय मोटरसाइकल, तीन दर्जन बढ़ी जीप र डीजे सहितको केहि ट्याक्टर समेत प्रयोग गरिएको थियो ।
