बिराटनगर, चैत्र ५
ताप्लेजुङको अस्थायी प्रहरी चौकी माथिल्लो फेदीमा कार्यरत ३ जना प्रहरी कर्मचारी १ नं प्रदेशको फाल्गुन महिनाको सर्वोत्कृष्ट प्रहरी (बेस्ट पुलिस अफ द मन्थ) घोषित भएका छन् । अस्थाई प्रहरी चौकी माथिल्लोफेदी ताप्लेजुङमा कार्यरत प्रहरी हवल्दार वेद कुमार अर्याल, प्रहरी जवान उपेन्द्र राई र प्रहरी जवान मनोज कुमार चौधरी अत्कृष्ट प्रहरी घोषित भएका हुन ।
ताप्लेजुङको फुङलिङ नगरपालिका वडा नं. १० स्थित सिस्ने भिरमा फागुन १५ गते भएको तत्कालिन पर्यटन मन्त्री समेत सवार हेलिकप्टर दुर्घटना हुँदा उक्त घटनास्थलमा कर्तव्य पालनाको शिलसिलामा आफ्नो जिउ ज्यानको प्रवाह नगरी अति जोखिमपूर्ण अवस्थामा अटुट र अनवरत रुपमा कर्तव्यनिष्ठ तवरले प्रतिकुल भौगलिक अवस्था र मौसमका बावजुद बहादुरी तथा उच्च मनोवलका साथ उद्धार, खोजतलास एवम् शव संकलन गर्ने कार्यमा खटिई देश र नागरिक समक्ष नेपाल प्रहरीको छवि उच्च बनाएकोले उनीहरुलाई महिनाको उत्कृष्ट प्रहरी घोषित गरिएको १ नं प्रदेश प्रहरी कार्यालय विराटनगरले जनाएको छ ।
प्रहरी कर्मचारीहरुको मनोवल उच्च बनाउन सम्पादित कार्यको उचित मूल्याङकन गर्दै १ नम्बर प्रदेश प्रहरीकार्यालय विराटनगरले प्रदेश भरीका प्रहरी कर्मचारीहरु मध्येबाट प्रत्येक महिना सर्वोत्कृष्ट प्रहरी छनौट गर्दै आइरहेको छ । सर्वोत्कृष्ट हुने प्रहरी कर्मचारीलाई पुरस्कृत गरी उत्कृष्ट कार्यको बिवरण सहितको फ्लेक्स प्रिन्ट गरेर १ नम्बर प्रदेश प्रहरी कार्यालय बिराटनगरमा निर्माण गरिएको स्तम्भ तथा १ नम्बर प्रदेश अन्तर्गत रहेका इलाका प्रहरी कार्यालय ‘क’ स्तरसम्मका प्रहरी कार्यालयहरुमा १ महिना सम्म राखिदै आएको छ ।
