विराटनगर,चैत २८
मोरङको सुन्दरहरैँचा नगरपालिका–४ बुधबारे चोकमा बुधवार कारको ठक्करबाट मोटरसाईकलमा सवार १ जनाको मृत्यु भएको छ । पूर्व–पश्चिम राजमार्ग अन्तर्गत पश्चिम तर्फ जाँदै गरेको बा ३ च ७९६२ नम्बरको कारले विपरीत दिशाबाट आउँदै गरेको को १५ प ९९७८ नम्बरको मोटरसाईकललाई राती ९ बजे ठक्कर दिएको थियो ।
कारको ठक्करबाट मोटरसाईकल चालक ईटहरी उप–महानगरपालिका–८ बस्ने २२ वर्षीय प्रकाश चौधरी र मोटरसाईकलको पछाडी सवार २२ वर्षीय हेम चौधरी गम्भीर घाइते भएका थिए ।
उनीहरुलाई उपचारको लागि नोबेल अस्पताल बिराटनगर पठाईएकोमा उपचारको क्रममा मोटरसाईकलको पछाडी सवार हेम चौधरीको राती साढे ९ बजे मृत्यु भएको इलाका प्रहरी कार्यालय बेलबारीले जनाएको छ ।
मोटरसाईकल चालकको सोही अस्पतालमा उपचार भईरहेको छ भने कार र चालकलाई प्रहरीको नियन्त्रणमा राखिएको छ ।
