विराटनगर, वैशाख १३
नयाँ संहिताले कुष्ठरोगीलाई विभेद गरेको शुक्रबार विराटनगरमा भएको एक कार्यक्रमका सहभागीहरुले बताएका छन् । एशोसिएशन फर आइडिया नेपालको आदर्श र नीति कुष्ठ प्रभावित व्यक्तिहरुको आत्मसम्मान र प्रगति बिषयक छलफल कार्यक्रमका सहभागीहरुले यस्तो बताएका हुन् ।
कार्यक्रममा बोल्दै एशोसिएशन फर आइडियल प्रदेश नम्बर ३ का महासचिव तारानाथ सिग्देलले नयाँ संहिताले कुष्ठरोगीहरुप्रति विभेद गरेको बताए ।
उनले नयाँ संहिताले कुष्ठरोग यदि श्रीमानलाई लागे श्रीमतीले पारपाचुके दिन पाउने र श्रीमतीलाई लागे श्रीमान्ले दिन पाउने ऐन आएको भन्दै सो दफा तत्काल संशोधन गर्न माग गरे ।
यस्तै देवानी संहिताको दफा ७१ को २ को ग मा कुष्ठरोगी भएकोलाई विवाह गर्नु या गराउनु हुदैन भनेर उल्लेख भएको भन्दै उनीहरुले आपत्ति जनाएका छन् ।
कार्यक्रममा बोल्दै एशोसिएशन फर आइडिया नेपालका कन्ट्री डाइरेक्टर शोभाकर कँडेलले अहिलेको कानुन कुष्ठप्रभावितका लागि विभेदपूर्ण रहेको बताए । उनले हाल नेपालमा ३ हजार २ सय कुष्ठरोगी रहेको बताए ।
सैगरी विश्वमा २ लाख कुष्ठरोगी रहेका मध्य भारतमा मात्रै ५० हजार कुष्ठरोगी रहेको उनको भनाई थियो । नेपाल कुष्ठप्रभावित मुलुक मध्ये ४ औ स्थानमा रहेको पनि उहाँले जानकारी दिए ।
यसैगरी प्रदेश नम्बर १ मा झापा, मोरङ र उदयपुरमा बढी मात्रामा कुष्ठ प्रभावित रहेको पूर्वाञ्चल क्षेत्रीय निर्देशनालयका क्षयकुष्ठ अधिकृत ध्रुव उराँवले जानकारी दिए । यस्तै कार्यक्रममा बोल्दै प्रदेश सांसद केदार कार्कीले विभेद कानुनका बारेमा सदन र सम्बन्धीत ठाँउहरुमा आवाज उठाउने बताए ।
