एजेन्सी, बैशाख २२
जारी इन्डियन प्रिमियर लिग (आईपीएल)मा रोयल च्यालेन्जर्स बेंगलोरले सुखद अन्त्य गरेको छ । शनिबार घरेलु मैदान चिन्नास्वामी स्टेडियममा सनराइजर्स हैदरावादलाई ४ विकेटले पराजित गर्दै बेंगलोरले सुखद अन्त्य गरेको हो । १ सय ७६ रनको विशाल लक्ष्य पछ्याएको बेंगलोरले १९।२ ओभरमा ६ विकेट गुमाउँदै पुरा गर्यो ।
बेंगलोरका लागि युवा खेलाडी शिम्रन हिटमायरले ७५ रनको उत्कृष्ट इनिङ्स खेले । १८ ओभरको चौथो बलमा राशिद खानले विजय शंकरबाट क्याच गराउनु अघि ४७ बलमा ४ चौका र ६ छक्का प्रहार गरे । चौथो विकेटका लागि गुरकीरतसिंह मान र हिटमायरले १ सय ४४ रनको कीर्तिमानी साझेदारी गरेपछि हैदरावाद पराजित हुन पुगेको हो । चौथो विकेटका लागि यो आईपीएलकै उच्च साझेदारी हो ।
उत्कृष्ट ब्याटिङ गरेका गुरकीरतसिंह ४८ बलमा ८ चौका र १ छक्का प्रहार गर्दै ६५ रनमा आउट भए । सिंहलाई खलिल अहमदले युसुफ पठानबाट क्याच गराए ।
पहिलो ओभरको तेस्रो बलमै भुवनेश्वकर कुमारले पार्थिव पटेललाई मनिष पान्डेबाट क्याच गराउँदै सुन्यमा पेभिलिएन फर्काए । दोस्रो ओभरको पाँचौ बलमा खलिल अहमदले रिद्धीमान शाहबाट क्याच गराउनु अघि कप्तान विराट कोहलीले ७ बलमा २ चौका र १ छक्का प्रहार गर्दै १६ रन जोडे । ठिक एक ओभरपछि कुमारले मार्टिन गुप्टिलबाट एवी डि भिलियर्सलाई १ रनमा क्याच आउट गराएका थिए ।हैदरावादका खलिल अहमद ३ र भुवनेश्वर कुमारले २ र राशिद खानले १ विकेट लिए ।
त्यसअघि टस हारेर पहिला ब्याटिङको निम्तो पाएको हैदरावादले २० ओभरमा ७ विकेटको क्षतिमा १ सय ७५ रन बनाएको थियो ।हैदरावादका लागि कप्तान केन विलियम्सनले जिम्मेवारीका साथ ब्याटिङ गर्दै ७० रनमा अविजित रहे । अन्तिम ओभरमा विलियम्सनले उमेश यादवलाई समान २ छक्का र चौका साथै भुवनेश्वर कुमारले १ चौका प्रहार गर्दै कुल २८ रन बटुलेपछि हैदरावादले बलियो योगफल तयार पार्न सफल भएको हो ।विलियम्सनले ४३ बलमा ५ चौका र ४ छक्का गरे । विलियम्सन बाहेक हैदरावादका अन्य कुनै पनि ब्याट्सम्यानले जिम्मेवारीका साथ ब्याटिङ गर्न सकेनन् । सर्वाधिक रन बनाउने ओपनर डेविड वार्नर र जोनी बयरस्टो अष्ट्रेलिया फर्किएपछि हैदरावाद ठूलो समस्यामा छ ।
चौथोे ओभरको तेस्रो बलमा रिद्धीमान शाहलाई नन्दीप सैनीले उमेश यादवबाट क्याच गराउँदै २० रनमा पेभिलिएन फर्काए । शाहले ११ बलमा ४ चौका प्रहार गरे । दोस्रो विकेटका रुपमा आठौं ओभरको दोस्रो बलमा ठूलो शट खेल्ने धुनमा मार्टिन गुप्टिल ३० रनमा आउट भए । वाशिन्टन सुन्दरले विराट कोहलीबाट क्याच गराउनु अघि गुप्टिलले २३ बलमा समान २ चौका र छक्का प्रहार गरे । मनिष पान्डे ९ र विजय शंकर २७ रनमा क्याच आउट भए । दुबै खेलाडी ठूलो शट प्रहार गर्ने धुनमा खराव शट खेल्दै आउट भएका थिए ।
१७ ओभरको अन्तिम बलमा मोहम्मद नाबी पनि ठूलो शट खेल्ने धुनमा ४ रनमा क्याच आउट भए । हैदरावादको एक तर्फबाट विकेट गुमि रहँदा अर्को तर्फबाट केन विलियम्सनले रन जोडि रहे । बेंगलोरका वाशिन्टन सुन्दरले ३,नन्दीप सैनीले २,युजवेन्द्र चाहलले १ विकेट लिए ।
योसँगै हैदरावादको अघिल्लो चरण कठिन बनेको छ । आईतबार मुम्बईसँग कोलकता फराकिलो अन्तरले पराजित भए नेट रन रेटमा हैदरावाद र कोलकता मध्य एक टोली प्ले अफ पुग्ने छ । कोलकता विजयी भए हैदरावादको अघिल्लो चरण समाप्त हुने छ । चेन्नई,मुम्बई र दिल्ली प्ले अफमा पुगि सकेका छन् । बेंगलोरले १४ खेलमा ५ मा जित र ८ मा हारका साथ सातौं स्थानमा रहँदै यो संस्करणको आईपीएल अन्त्य गरेको छ ।
