विराटनगर, वैशाख २७
आगामी जेठ १ गतेदेखि काठमाडौंमा हुने प्रधानमन्त्री कप एक दिवसिय क्रिकेट प्रतियोगिताकालागी प्रदेश १ को खेलाडी छनौट प्रक्रिया विवादमा परेको छ । प्रतियोगिताका लागि प्रकृयागत रुपमा खेलाडी छनौट गर्नुपर्ने भएपनि विना प्रकृया खेलाडी छनौट गरेर बन्द प्रशिक्षण सुरु गरेको भन्दै प्रदेश नं. १ का क्रिकेट खेलाडीहरुले शुक्रबार विराटनगरमा पत्रकार सम्मेलन गर्दै आपत्तिजनाएका छन् ।
खेलाडी छनौट प्रक्रियामा नाताबाद कृपावाद हावी भएर खेलाडी छनौट गरिएको नेपालका पूर्व अन्तराष्ट्रिय खेलाडी राजकुमार प्रधानको नेतृत्वमा पत्रकार सम्मेलन गर्दै मोरङका खेलाडीहरुले नियम संगत खेलाडी छनौट गर्न माग गरेका छन् ।
पत्रकार सम्मेलनमा छनौट प्रकृया नै पुरा नगरी खेलाडी बन्द प्रशिक्षणका लागी पठाइएको उनीहरुले उदयीमान खेलाडीहरु अन्यायमा परेको आरोप लगाए । खेलाडी छनौटको जिम्मेवारी क्षेत्रीय खेलकुद विकास समितिलाई दिएको कारण छनौट खेल नखेलाई नाताबादको आधारमा खेलाडी छनौट गरेको क्रिकेट खेलाडी नारायण स्वर्णकारले आरोप लगाए ।
प्रदेश १ का क्रिकेट शिक्षक प्रदिपराज पाण्डेले छनौट खेलनै नखेलाई आफ्ना क्लबका खेलाडीलाई बन्द प्रशिक्षकोलागी सिधै छनौट गरेको पूर्व अन्तराष्ट्रिय खेलाडी राजकुमार प्रधानले बताए ।
पाण्डे क्षेत्रीय खेलकुद विकास समितिका प्रशिक्षक हुन् । पूर्व अन्तराष्ट्रिय खेलाडी प्रधानले प्रशिक्षक पाण्डेले व्यक्तिगत रुपमा मोरङका खेलाडी बोलाएर बन्द प्रशिक्षणमा लगेको बताए । उनले खेलाडीको भबिष्यमाथिनै खेलवाड गर्नेकाम बन्द गर्नु पर्ने माग गरे । उनले अहिलेको प्रक्रिायालाई तत्काल सच्याउनु पर्ने माग गरे ।
नताबादको आधारमा खेलाडी छनौट गर्दा नयाँ प्रतिभान खेलाडीहरुलाई असर पर्ने राष्ट्रिय खेलाडी काली चरण यादवले बताए । किर्तिपुर स्थित त्रिवि क्रिकेट मैदानमा जेठ १ देखि २४ गतेसम्म हुने प्रधानमन्त्री कप क्रिकेट प्रतियोगीतालागी मोरङमा छनौट प्रतियोगीता नगराई सिधै खेलाडी छान्ने काम भएको आरोप उनीहरुले लागाएका हुन् ।
क्षेत्रीय खेलकुद विकास समिति प्रदेश १ का क्रिकेट प्रशिक्षक पाण्डेले खेलाडीलाई व्यक्तिगत रुपमा खबर पठाएर बन्द प्रशिक्षणमा बोलाएको जिल्ला क्रिकेट संघका सदस्य अजय राजवंशीले बताए । राष्ट्रिय खेलकुद परिषदले चिठ्ठि पठाएर खेलाडी छनौट गराउनु पर्ने भए पनि त्यसो नगरेको उनले आरोप लागाए । क्षेत्रीय खेलकुद परिषद विराटनगरले बन्द प्रशिक्षणको जिम्मा पाण्डेलाई दिएको छ ।
एता प्रशिक्षक पाण्डेले भने आफु कर्मचारी भएकाले खेलकुद विकास समितिले लगाएको काम गरेको बताए । यता क्षेत्रीय खेलकुद विकास समिति प्रदेश नं. १ का अध्यक्ष रविन नगरकोटीले राष्ट्रिय खेलकुद परिषदले कुनै पत्र नपठाएकोले आफुलाई यस विषमा कुनै जानकारी नभएको बताए । प्रदेश १ बाट बन्द प्रशिक्षणमा २६ खेलाडीमध्ये मोरङबाटमात्र ११ खेलाडी रहेका छन् । उनिहरुको बन्द प्रशिक्षण सुनसरीको इनरुवामा भइरहेको छ ।
