प्रदेश नम्बर १ मा बेरोजगारी दर ११ दशमलब २ प्रतिशत रहेको पाइएको छ । केन्द्रीय तथ्याङक विभाग, तथ्याङक कार्यालय मोरङले आयोजना गरेको नेपाल श्रम शक्ति सर्वेक्षणको तेस्रो स्थलगत तथ्याङ्कले यस्तो अवस्था देखाएको हो ।
प्रदेश नम्बर १ मा बेरोजगारी दर ११ दशमलब २ प्रतिशत रहेको छ भने पुरुषको १० दशमलब ८ प्रतिशत र महिलाको ११ दशमलब ९ प्रतिशत बेरोजगारी दर रहेको केन्द्रीय तथ्याङक विभाग घरपरिवार सर्वेक्षण शाखाका निर्देशक देवेन्द्रलाल कारञ्जितले बताए । यस्तै प्रदेश १ मा श्रम शक्तिमा सहभागिता दर जम्मा ३७ दशमलब ८ प्रतिशत रहेकोमा पुरुष ५२ दशमलब ७ प्रतिशत र महिला २५ दशमलब ६ प्रतिशत रहेको कारञ्जितले जानकारी दिए । रोजगारीमा रहेको जनसंख्यालाई प्रदेश अनुसार हेर्दा सबैभन्दा बढी ४३ दशमलब ८ प्रतिशत प्रदेश नम्बर ३ मा र सबैभन्दा कम २४ दशमलब १ प्रतिशत सुदुरपश्चिम प्रदेशमा रहेको तथ्याङ्क प्रस्तुत गरिएको थियो । यस्तै बेरोजगारी दरलाई प्रदेश अनुसार हेर्दा सबैभन्दा बढी प्रदेश नम्बर २ मा २० दशमलब १ प्रतिशत र सबैभन्दा कम प्रदेश नम्बर ३ मा ७ प्रतिशत रहेको तथ्याङ्कले देखाएको छ । यसैगरी नेपालमा सबैभन्दा बढी व्यक्तिहरु कृषि, वन र माछापालन , थोक तथा खुद्रा विक्री , मोटरगाडी तथा मोटरसाइकल मर्मत सम्भार , उद्योग निर्माण र शिक्षामा रोजगारी भएको तथ्याङक प्रस्तुत गरिएको थियो ।
नेपालमा १५ बर्ष बढी उमेरका व्यक्तिहरुको जनसंख्या २ करोड ७ लाख ४४ हजार रहेको छ । जसमा काम गर्ने उमेरको जनसंख्या ७० लाख ८६ हजार जनसंख्या रोजगारीको क्षेत्रमा रहेका छन् । नेपाल श्रमशक्ति सर्वेक्षणले २०७४ असार देखि २०७५ जेठसम्मको स्थलगत तथ्याङ्कले माथिको अवस्था देखाएको हो । 
