२४ असार, विराटनगर ।
प्रदेश १ प्रमुख प्रा.डा गोविन्दबहादुर तुम्बाहाङले प्रदेश नम्बर १ को प्रदेशसभाबाट पारित भएका दुईवटा विधेयक आज एकै साथ प्रमाणीकरण गरेका छन् । प्रमाणिकरण भएका विधेयकहरूमा आब ०७६/७७ को सेवा र सुविधा कार्यको लागि प्रदेश संचित कोषबाट केही रकम खर्च गर्ने र विनियोजन गर्ने सम्बन्धमा बनेको विधेयक —२०७६ र प्रदेश सरकारको अर्थ सम्बन्धि प्रस्तावलाई कार्यान्व्यन गर्न बनेको विधेयक —२०७६ रहेको छ ।
प्रदेशसभाको असार २० गते बसेको चौथो तथा बजेट अधिबेशनको २३ औं बैठकले प्रदेश विनियोजन विधेयक र असार ६ गते बसेको १५ औ बैठकले कार्यान्वयन गर्न बनेको विधेयक पारित गरेको थियो । प्रदेशसभाबाट पारित भएका विधेयकहरू नेपालको संविधानको धारा २०१(१) बमोजिम तुम्बाहाङले प्रमाणिकरण गरेको प्रदेश प्रमुखका प्रेस सल्लाहकार शेखर रेग्मीले बताए । यो सहित प्रदेशसभाबाट पारित भएर प्रमाणिकरका लागि आएका विधेयकको संख्या ३३ पुगेको रेग्मीले जानकारी दिए ।
