१ साउन, विराटनगर ।
मोरङमा सम्बन्ध विच्छेद गर्नेको संख्या बढेको छ । अघिल्लो आर्थिक वर्षभन्दा गत आर्थिक वर्ष सम्बन्ध विच्छेद गर्नेको संख्या बढेको हो ।
गत आर्थिक वर्ष २०७५/०७६ को साउनदेखि असार मसान्तसम्म १ हजार १ सय १२ जनाले सम्बन्ध विच्छेदका लागि मुद्दा दर्ता गरेको जिल्ला अदालत मोरङले जनाएको छ । दर्ता भएका मुद्दामध्ये ८ सय ३५ फस्र्यौट भइसकेको जिल्ला अदालत मोरङका न्यायाधीश राजुकुमार खतिवडाले जानकारी दिए ।
अघिल्लो आर्थिक वर्ष २०७४/०७५ मा ८ सय ८३ जनाले सम्बन्ध विच्छेदका लागि मुद्दा दर्ता गरेकोमा ७ सय १७ वटा मुद्दा फस्यौट भएको थियो । गत आर्थिक वर्ष अदालतमा सम्बन्ध विच्छेद गरी पाउ भनी निवेदन दर्ता गर्नेमा २५ प्रतिशत पुरुष रहेको जनाइएको छ । न्यायाधीश खतिवडाले नयाँ मुलुकी संहिता लागू भएयता २ सय ३६ जना पुरुषले सम्बन्ध विच्छेदका गरी पाउ भनी मुद्दा दर्ता गरेको बताए । अधिकांश श्रीमतीहरुले घर छोडेर हिडेको, मानसिक र शारीरिक यातना दिएको, श्रीमती दोस्रो विवाह गरेको लगायतका मुद्दा परेको उनले बताए ।
यस्तै ८ सय ७६ महिलाहरुले सम्बन्ध विच्छेद गरी पाँउ भनी निवेदन दर्ता गरेको न्यायाधीश खतिवडाको भनाइ छ । अदालतमार्फत मेलमिलाप हुन नसकेपछि मात्रै सम्बन्ध विच्छेद गर्ने गरिएको न्यायाधीश खतिवडाले जानकारी दिए ।
