३ साउन, विराटनगर ।
विभिन्न प्रलोभनमा पारी भारत लान लागिएको मोरङको उर्लाबारीका १० जनाको उद्धारका साथै बेचबिखनमा संलग्न तीन जनालाई नियन्त्रणमा लिईएको छ । उर्लाबारी नगरपालिका–४ बस्ने ८ जना पुरुष र २ जना महिलालाई जागिरमा लगाईदिने प्रलोभनमा पारी भारतको कश्मिर लान खोज्ने उर्लाबारी– ४ का पुड्का उराव, उनकी श्रीमती फुलकुमारी उराव र सुनसरी हरिनगराका अफिज अन्सारीलाई प्रहरीले बिहीबार पक्राउ गरेको हो ।
उराव दम्पत्तीले पिडितहरुलाई अलग अलग भेटी भारतको कश्मिरमा राम्रो काममा लगाई दिन्छौँ, मासिक तलब भा.रु.१७,०००।– हुन्छ, ओभर टाईमको छुट्टै पारिश्रमिक हुन्छ भन्दै प्रलोभनमा पारेका थिए । उनीहरुले अफिज अन्सारीको भारतको कश्मिरको ठेकेदारसंग सम्पर्क छ भन्दै विश्वासमा पारेर उर्लाबारीमा भेला जम्मा गराई कसैले सोधे सुनसरी हिँडेको भन्नु, कसैलाई सम्पर्क नगर्नु भनी आफिजको घरमा साँझ चार बजे पर्याएको पिडितले बयान दिएृको प्रहरीले जनाएको छ ।
उनीहरुले साँझ परेपछी भारतको जोगबनीबाट रेल चढेर जानुपर्छ भनेर कुरा गर्न थालेपछि शंका लागेर बुझ्दा रोजगारको प्रलोभन देखाई कश्मिरमा लगी भारतीय दलालहरुलाई बेची श्रम शोषण गर्ने उदेश्यले भारत लान लागेको र उराव दम्पतीले अफिज अन्सारीसँग त्यहां पुर्याए बापत रकम लिई फर्कन लागेको थाहा पाएर पिडितले प्रहरीलाई खबर गरेका थिए ।
प्रहरी समक्ष जानकारी गराएपछी मोरङ प्रहरी र स्थानीय प्रहरी समेत परिचालन गरी पुड्का उराव, उनकी श्रीमती फुलकुमारी उराव र अफिज अन्सारीलाई ईलाका प्रहरी कार्यालय उर्लाबारी समतेको टोलीले नियन्त्रणमा लिएको हो । उनीहरुलाई जिल्ला अदालत मोरङबाट म्याद थप भई अनुसन्धान कार्य भईरहेको छ भने १० जना ब्यक्तीहरुको उद्धार गरी आफन्तलाई जिम्मा बुझाईएको छ ।
