१२ साउन, विराटनगर ।
नेपालमा कार्यरत र अध्ययनरत भारतीय नागरिकहरुका लागि विराटनगरमा तीन दिने रजिष्ट्रेशन शिविर सुरु गरिएको छ । भारतीय राजदुताबास काठमाडौ र मोरङ व्यापार संघले संयुक्तरुपमा आयोजना गरेको रजिष्ट्रेशन शिविरमा शनिबारमात्रै ५ सय भन्दा बढी भारतीयले दर्ता प्रमाणपत्र लिएको मोरङ व्यापार संघले जनाएको छ ।
मोरङ व्यापार संघका अध्यक्ष प्रकाश मुन्दडाले भारतीय राजदुताबासलाई अनुरोध गरी नेपालमा कार्यरत/अध्ययनरत हजारौ भारतीय नागरिकलाई सहयोग हुनेगरी रजिष्ट्रेशन आयोजना गरिएको बताए । शनिबारबाट सुरु भएको रजिष्ट्रेशन सोमबारसम्म चल्ने जनाईएको छ ।
यहाँ कार्यरत र अध्ययनरत भारतीयहरुले आवश्यक विभिन्न कागजातहरु बुझाई सम्पूर्ण प्रक्रिया पुर्याएपछि भारतीय राजदुताबासको दर्ता प्रमाण पत्र प्रदान गरिने छ । यस अघिपनि मोरंग व्यापार संघको पहलमा गत २०७५ पौषमा एक दिने दर्ता क्याम्प आयोजना गरिएको थियो ।
