साउन २०, एजेन्सी । भारत प्रशासित जम्मू कश्मीरमा सुरक्षाको कारण देखाउदै स्थानीय नेतालाई भारतीय सेनाले नजरबन्दमा राखेको छ ।
नेश्नल कन्फरेन्सका नेता उमर अब्दुल्ला, पीडीपी अध्यक्ष मेहबूबा मुफ्ती र जम्मू कश्मिर पीपल्स कन्फरेन्सका अध्यक्ष सज्जाद लोनलाई उनीहरूकै घरमा नजरबन्द गरिएको छ ।
त्यहाँ मानिसहरूको आवतजावतमा कडाइ गरिएको छ । श्रीनगरमा मानिसहरूको आवतजावत रोक्न संविधानको धारा १४४ लागु गरिएको जनाएको छ ।
यो आदेशअनुसार मानिसहरूको आवतजावतमा बन्देज लगाइएको छ र सबै शिक्षण संस्थाहरू बन्द भएका छन् । श्रीनगरमा मोबाइल फोन र इन्टरनेटको सेवा पनि बन्द गरिएको छ ।
भारतले नश्लवादी आक्रमणको आशंकामा त्याहा दशौँ हजार सैनिक कश्मीर उपत्यकामा खटाइसकेको छ । नजरबन्दपछि पहिलो पटक ट्वीट गर्दै भूतपूर्व मूख्यमन्त्री अब्दुल्लाहले अहिलेको विकसित घटनाक्रम राम्रो नभएपनि कानुन उल्लङ्घन नगर्न सर्वसाधारणलाई आग्रह गर्नुभएको छ ।
यस्तै पीडीपी नेता महबूबा मुफ्तीले लोकतन्त्रका लागि लगेका नेताहरूलाई नजरबन्द राखिनु विडम्बनापूर्ण भएको बताउनु भएको छ । भारत सरकारले आर्टिकल ३५ ए र अनुच्छेद ३७० लाई समाप्त पार्न लागेको अनुमान हुँदै गर्दे जम्मू कश्मीरका मूलधार दलका नेताहरूले आइतवार साँझ बैठक गरी कश्मिरले प्राप्त गरेको विशेष स्थान मान्यतालाई जोगाउने प्रतिबद्धता व्यक्त गरेका थिए ।
यसैबीच जम्मू–कश्मीर प्रशासनले जारी गरेको विज्ञप्तिलाई मध्यनजर गर्दै बेलायत, अष्ट्रेलिया र जर्मनीले आफ्ना नागरिकलाई कश्मीर यात्रा नगर्न सल्लाह दिएका छन् ।
गत फेब्रुअरीमा पाकिस्तानमा आधार बनाएको भनिएको एउटा सशस्त्र समूहले गराएको आत्मघाती आक्रमणमा ४० जनाभन्दा बढी भारतीय सैन्य जवानहरू मारिएपछि दुई देशबीच पछिल्लो तनाव सुरु भएको थियो ।
पाकिस्तान र भारत दुवै देशहरूले दाबी गर्दै आएको कश्मिरका सशस्त्र विद्रोहीहरूलाई पाकिस्तानले सहायता गरेको आरोप भारतले लामो सयमदेखि लगाउँदै आएको छ । भारत र पाकिस्तानले दाबी गर्ने गरेको कश्मिरका केही भूभागहरू मात्र उनीहरूको नियन्त्रणमा रहेको छ ।
सन् १९४७ मा भारत र पाकिस्तान टुक्रिएपछि दुई देशबीच चार पटकसम्म युद्ध भइसकेको छ । उनीहरू बीचको द्वन्द्वमा कश्मिरको विषय मुख्य हुने गरेको छ।
