२१ साउन, विराटनगर ।
अब प्रदेश नम्बर १ मा पनि विद्युतीय बस सञ्चालन गरिने भएको छ । प्रदेश १ सरकारको समन्वयमा निजी क्षेत्रले सञ्चालन गर्ने विद्युतीय बसका लागि आन्तरिक तयारी सुरु गरेको हो ।
झापा, मोरङ र सुनसरीभित्र ६ वटा चार्जिङ सेन्टरका लागि जग्गा उपलब्ध भए पाँच महिनाभित्रमा विद्युतीय बस सञ्चालन गर्न सकिने जनाईएको छ । विद्युतीय बस सञ्चालनका लागि प्रदेश १ का मुख्यमन्त्री शेरधन राईसँग निजी क्षेत्रले सहयोगको आग्रहसमेत गरेका छन् । विद्युतीय बसको चर्चा भईरहेका बेला नेपालमै पहिलो पटक काठमाडौँमा बस सञ्चालन गर्ने तयारी गरेसँगै प्रदेश १ मा पनि बस सञ्चालन गर्ने प्रस्ताव गरिएको हो ।
चार्जिङ स्टेशनका लागि विराटनगर, काँकडभिट्टा, इटहरी, धरान, दमकलगायत क्षेत्रमा सात कठ्ठादेखि नौ कठ्ठाको दरले जग्गा उपलब्ध भएमा तीन महिनाभित्र चार्जिङ स्टेशन बनाई यातायात सञ्चालन गर्न सकिने विद्युतीय बस सञ्चालनका लागि प्रस्ताव गर्ने सुन्दर याताया प्रालि विद्युतीय सवारी साधनका अध्यक्ष भेषबहादुर थापाले जानकारी दिए । उनका अनुसार पहिलो चरणमा विराटनगर–काँकडभिट्टा र विराटनगर–धरान विद्युतीय बस सञ्चालन गर्ने तयारी रहेको छ ।
मुख्यमन्त्री राईले पनि यो प्रक्रियाको लागि सरकारले सहजीकरण गर्ने र विद्युतीय बस सञ्चालनको लागि आवश्यक प्रक्रिया चाँडै नै अघि बढाइने प्रतिबद्धता व्यक्त गरे ।
एउटा चार्जिङ स्टेशन निर्माण गर्न ७० लाखसम्म खर्च हुने थापाले बताए । सञ्चालन हुने बसको मुल्य १ करोड ६२ लाख पर्छ । ४० सिट क्षमता भएको बसमा उभिएर समेत गरी ७० जनासम्म यात्रुले यात्रा गर्न सक्ने बताइएको छ । त्यस्तै अपांगमैत्रीसमेत हुने बसमा एसीको सुविधा हुन्छ । बस सञ्चालन भए सरकारले तोकेको भन्दा ३० प्रतिशत भाडा घट्ने थापाले दाबी गरिएको छ । विद्युतीय बस एकपटक चार्ज गरेपछि बस २६८ किलोमिटर दौडन सक्छ ।
