साउन २६, विराटनगर । महेन्द्र मोरङ्ग आर्दश बहुमुखी क्याम्पस बि.बि.ए. छैटौँ सेमेस्टरका विद्यार्थीहरुले सामाजिक विकृति र विसङ्गतीविरुद्ध प्रदेश १ स्तरीय प्रतिस्पर्धात्मक कार्यक्रम गराउने भएका छन् ।
समाज रुपान्तरणमा सकारात्मक परिवर्तन ल्याउने उद्धेश्यका साथ विद्यार्थीहरुले यस क्षेत्रमा सञ्चालित विभिन्न बिबिए/बिबिएम कलेजहरुवीच यही साउन ३१ गते बीरेन्द्र सभागृहमा एक दिन प्रतिस्पर्धात्मक कार्यक्रम गराउने भएका हुन् ।
कार्यक्रमको पूर्व सन्ध्यामा साउन २८ गते मंगलबार महेन्द्रमोरङ्ग क्याम्पस बि.बि.ए.का सम्पूर्ण विद्यार्थीहरुको सहभागितामा र्याली पनि आयोजना गरिने कार्यक्रम संयोजक उद्दगम मिश्रले जानकारी दिए ।
“स्पिक अप” नाम दिइएको उक्त कार्यक्रम “स्पिक अप फर दोज हु कान्ट प्रोटेक्ट देम्सेल्भ्स्” भन्ने नाराका साथ आयोजना गरिने व्यवस्थापन टिमका सदस्य बादल विष्टले जानकारी दिए ।
विराटनगर महानगरपालिकाको सहयोगमा आयोजना हुने कार्यक्रमको तयारी अन्तिम चरणमा पुगेको विद्यार्थीहरुले जनाएका छन् । यस किसिमको सचेतना मूलक प्रतिस्पर्धात्मक कार्यक्रम नेपालमै दोस्रो पटक आयोजना गर्न लागिएको विद्यार्थीहरुले दावी गरेका छन् ।
