१० भदौ, काठमाडौं ।
सांसदहरु अनुपस्थित भएपछि कोरम नपुग्दा मङगलबारका लागि बोलाइएको राज्य व्यवस्था समितिको बैठक बस्दै नबसि स्थगित भएको छ ।
दिउँसो २ बजेका लागि बोलाइएको बैठकमा नागरिकता विधेयकका बारेमा छलफल गर्ने कार्यसूची रहेको थियो । तर, समितिमा नौ जना मात्रै सांसद उपस्थित भएपछि बैठक बस्न नसकेको समितिका सभापति शशी श्रेष्ठले जानकारी दिइन् ।
समितिको बैठक बस्न समितिमा रहेका कुल सदस्यमध्ये एक चौथाई सदस्य उपस्थित हुनुपर्ने व्यवस्था छ । यसअनुसार बैठक बस्न १३ जना सांसद आवश्यक पर्छ ।
यसअघि सांसदहरुबीच वैवाहिक अंगिकृत नागरिकतामा विवाद आएपछि समितिले सांसद विजय सुव्वाको नेतृत्वमा समाधान उपसमिति गठन गरेको थियो । सो उपसमितिले सहमति भएका विषयको प्रतिवेदन सभापति श्रेष्ठलाई बुझाएको छ ।
