१५ भदौ, विराटनगर ।
आज दरखाने दिन । हरितालिका तीज अर्थात भाद्र शुक्ल द्वितीयाको अघिल्लो दिन नेपाली हिन्दु महिलाहरुमा दर खाने दिनको विशेष महत्व रहन्छ । तीजको व्रत बस्न शक्ति प्राप्त हुन्छ भन्ने विश्वासका साथ नेपाली हिन्दु नारीहरुले दर खाने परम्परा छ ।
धार्मिक मान्यतानुसार सत्य युगमा पार्वतीले पनि भाद्र शुक्ल द्वितियाका दिन दर खाई तृतीयामा व्रत गर्दा महादेव स्वामी पाएको पौराणिक विश्वास छ । तीजमा माइतीले छोरीचेलीलाई घरमा बोलाएर मीठामीठा परिकार ख्वाउने चलन छ ।
दर खाने दिनबाट तीज पर्वको सुरु हुन्छ । दरमा खिर, ढकने, सेलरोटी, फलफुल, मिठाई आदि अथवा ठाउँ अनुसार विभिन्न मिठामिठा परिकार खाने गरिन्छ । सामान्यतया दर मध्यरात १२ बजेअघि खाने चलन रहिआएको छ ।
भोलिपल्ट दिनभर पानीसम्म नपिई बस्नुपर्ने भएकोले दर खाने दिन राति ढिलासम्म बसेर पेटभरि खाने प्रचलन बसेको हो । पछिल्लो समयमा एक महिना अघिदेखि नै सामुहिक रुपमा तीजको दरखाने, होटल तथा पार्टिप्यालेसहरुमा तढकबढकका साथ दरखाने गरेकामा विभिन्न आलोचना समेत हुन थालेको छ ।
