भदौ १७, काठमाडौं । अमेरिका र अफगानिस्तानमा सशस्त्र संघर्ष गरिरहेको तालिबान विद्रोहीबीच सहमति भएको छ ।
तालिबानसँगको वार्तामा सहभागी एकजना अमेरिकी उच्च अधिकारीलाई उद्धृत गर्दै अन्तर्रा्ष्ट्रिय सन्चारमाध्यमहरुले दुई पक्षबीच सैद्धान्तिक सहमति बनेको दाबी गरेका छन् ।
अफगानिस्तनमा हाल १४ हजार अमेरिकी सेना तैनाथ छन् । सहमतिअनुसार अमेरिकाले आउँदो २० हप्ताभित्र अफगानिस्तानबाट आफ्ना ५४ सय सैनिक फिर्ता लैजानुपर्नेछ ।
अफगानमूलका अमेरिकी कूटनीतिज्ञ जल्मय खलिलजादले अन्तर्वार्ताका क्रममा सहमतिबारे विस्तृत जानकारी गराएका हुन् । तर, सहमतिमा राष्ट्रपति डोनाल्ड ट्रम्पबाट अन्तिम स्वीकृति मिल्न बाँकी नै छ ।
यसैविच, खलिलजादले सहमतिबारे बताइरहेका बेला अफगानिस्तानमा भने ठूलो विस्फोट भएको छ । काबुलमा भएको विस्फोटमा परी कम्तीमा ५ जना सर्वसाधारणको ज्यान गएको छ । अन्य थुप्रै मानिस घाइते भएका छन् । आक्रमणको जिम्मा तालिबान विद्रोहीले लिएको छ ।
