भदौ १७, विराटनगर । दुईसाता बढी पूरानो बिल र बिषादी परीक्षणको प्रमाणपत्रको आधारमा आयात गर्न लागिएको तरकारी मोरङ प्रहरीले विराटनगरबाट बरामद गरेको छ ।
धारतीय बजार जोगबनीबाट विराटनगरतर्फ ल्याइदै गरेको ६ सय केजी तरकारी प्रहरीले मंगलबार बिहान बरामद गरेको हो । दुईसाता बढी पूरानो बिषादि परीक्षणको प्रमाणपत्र र बिलको आधारमा ब्यापारीले तरकारी ल्याइरहेको फेला परेपछि ४ ठेला तरकारी नियन्त्रणमा लिइएको जिल्ला प्रहरी कार्यालय मोरङका डिएसपी घनश्याम श्रेष्ठले जानकारी दिए ।
बरामद गरिएका तरकारी विराटनगर भन्सार कार्याललाई बुझाइएको उनले बताए । विराट आँखा अस्पताल नजिकैबाट प्रहरीले ४ वटा ठेलामा लोड गरिएको परवल,गोलभेडा,चटेल र खुर्सानी नियन्त्रणमा लिएको हो ।
बरामद गरिएको तरकारीको साउन ३० गते बिल काटिएको छ भने साउन ३१ गते विर्तामोडस्थित विषादी अवशेष द्र्रुत विश्लेषण प्रयोगशाला इकाईबाट बिषादी परीक्षण गरिएको प्रमाणपत्र तरकारी ल्याउदै गरेको ठेलाचालकसंग भेटिएको छ ।
बिल र बिषादीको प्रमाणपत्र दुईसाता पूरानो भएपनि विराटनगर भन्सार कार्यालयले भने मंगलबारको मितिमा नियमानुुसारको राजश्व लिएर तरकारी नेपालतर्फ ल्याउन अनुमति दिएको देखिएको छ ।
विराटनगरस्थित राम ट्रेडर्सको नाममा सो तरकारी आयात गरिएको बरामद तरकारीको बिलमा उल्लेख छ । बरामद गरिएका तरकारी र बिलमा उल्लेख गरिएको परिमाण समेत फरकफरक छ । बिलमा कांक्रा,हरियो खोर्सानी र ओल उल्लेख नगरिएको भएपनि ती सामाग्रिहरु समेत ठेलामा लोड रहेको भेटिएको छ ।
ब्यापारी र भन्सारका कर्मचारीको मिलेमतोमा एउटै बिल र प्रमाणपत्र देखाएर कयौं पटकसम्म तरकारी लगायतका सामाग्र्री ओसार्ने गरिएको सरोकारवालाले यसअघि देखिनै दाबी गर्दै आएका छन । यता भन्सार प्रशासनले भने भिडभाडका कारण विलमा अन्जानमा हस्ताक्षर भएको भन्दै मिलेमतो नभएको प्रष्ट पारेको छ ।
