भदौ १७, काठमाडौं । पत्रकार शालिकराम पुडासैनी आत्महत्या प्रकरणमा मुछिएका कार्यक्रम प्रस्तोता रवि लामिछाने जिल्ला अदालत चितवनको आदेशविरूद्ध उच्च अदालत गएका छन् ।
लामिछानेले मंगलबार पाटन उच्चअदालतको हेटौंडा इजलासमा निवेदन दिएका हुन् । उनको निवेदनमा आफूलाई पाँचलाख धरौटी तिराउने जिल्ला अदालतको आदेश बेरितपूर्ण भएको भन्दै बदर गर्न माग गरिएको उच्च अदालतको हेटौंडा इजलासका सहरजिष्ट्रार केशर अर्यालले जानकारी दिए ।
लामिछानेको निवेदनमाआफूले आत्महत्या दुरुत्साहन नगरेकाले साधारण तारिखमा रिहा हुनु पर्ने र विदेश जान प्रतिबन्ध लगाउन नहुने जिकिर गरिएको छ ।
पुडासैनीलाई आत्महत्यागर्न ’दुरुत्साहन’ गरेको अभियोग लागेका लामिछाने र युवराज कँडेल जिल्ला अदालत चितवनले भदौ ९ गते क्रमश पाँच र तीनलाख रुपैयाँ धरौटी मागेको थियो ।
जिल्ला न्यायाधीश हेमन्त रावलको इजलासले सोही मुद्दामा पक्राउ परेकी अस्मिता कार्कीलाई सामान्य तारेखमा छोड्न आदेश दिएको थियो ।
पुडासैनी साउन २१ गते चितवनको कंगारू होटलमा झुण्डिएको अवस्थामा फेला परेका थिए । उनको साथबाट आत्महत्याअघि खिचिएको भिडियो प्राप्तभएको थियो । जसमा उनले लामिछानेसहित तीनै जनाका कारण आफू मर्नुपरेको बताएका थिए ।
