२८ भदौ, एजेन्सी ।
साउदी अरेबियाको दुईवटा प्रमुख तेल खानीमा ड्रोन आक्रमण हुँदा भीषण आगलागी भएको छ । सरकारी स्वामित्वमा रहेका तेल खानीका तेल प्रशोधन केन्द्रमा ड्रोन आक्रमण भएको साउदी अरेबियाको सरकारी सञ्चार माध्यमले जनाएको छ ।
अबकेकमा रहेको अरामको कम्पनीको तेल प्रशोधन केन्द्रमा ड्रोन आक्रमण भएको हो । दोस्रो ड्रोन आक्रमण खुराइसमा रहेको तेल प्रशोधन केन्द्रमा भएको हो र त्यसका कारण भीषण आगलागी भएको छ । आगलागी हाल नियन्त्रणमा आएको साउदी अरेबियाको सरकारी सञ्चार माध्यमले जनाएको छ ।
साउदी अरेबियामा यसअघि हुने गरेका यस्ता आक्रमणमा इरानको सहयोग पाएका हुथी बिद्रोहीको संलग्नता रहने गरेको थियो । तर हालको आक्रमणमा कसको संलग्नता थियो भन्ने खुलाइएको छैन । नेपाली समय अनुसार शनिबार बिहान पौने सात बजेतिर आक्रमण भएको हो ।
