५ असोज, एजेन्सी । यमनमा संघर्ष गर्दै आएको हुथी बिद्रोहीले गरेको शान्तिको प्रस्तावलाई संयुक्त राष्ट्रसंघले स्वागत गरेको छ ।
इरानको साथ पाएको हुथी बिद्रोहीले शान्ति प्रक्रियाका लागि आफ्नो तर्फबाट महत्वपूर्ण प्रयासका रुपमा साउदी अरेबियामाथि कुनै पनि प्रकारको आक्रमण नगर्ने प्रस्ताव गरेको हो ।
हुथीको तर्फबाट आएको प्रस्ताव सन् २०१५ को मध्यदेखि यमनमा जारी हिंसा अन्त्यका लागि महत्वपूर्ण सन्देश बन्न सक्ने संयुक्त राष्ट्रसंघले जनाएको छ ।
साउदी अरेबियाका दुई ठूला तेल प्रशोधन केन्द्रमा भएको ड्रोन तथा क्रुज मिसाइल आक्रमणको एक हप्तापछि हुथी बिद्रोहीले शान्तिका लागि आफ्नो तर्फबाट प्रस्ताव गरेको हो ।
सरकारी स्वामित्वका दुई ठूला तेल प्रशोधन केन्द्रमा सेप्टेम्बर १४ मा भएको आक्रमणको जिम्मा हुथी बिद्रोहीले लिएको छ । तर साउदी अरेबिया र अमेरिकाले भने सो आक्रमण इरानले गरेको बताउँदै आएका छन् । इरानले आरोप अस्वीकार गर्दै आएको छ ।
यमनमा चार वर्षदेखि जारी गृह युद्धका कारण हालसम्म १० हजार भन्दा बढीको ज्यान गएको छ । दशौँलाख मानिस भोकमरीको चपेटामा परेका छन् ।
