५ असोज, विराटनगर । प्रमुख विपक्षी नेपाली कांग्रेसको अवरोधका बाबजुद प्रदेश १ को प्रदेशसभा बैठकमा मनमोहन प्राविधिक विश्वविद्यालयसम्बन्धी विधेयक पेश भएको छ ।
प्रदेशसभाको आइतबार बसेको बैठकमा सामाजिक विकास समिति सभापति सरिता थापाले समितिको प्रतिवेदनसहित विधेयक प्रदेशसभामा पेश गरेकी हुन् ।
बैठक सुरु भए लगतै नेपाली कांग्रेसले भने विधेयक सच्याउन माग गर्दै रोष्टम घेराउ गरी नाराबाजी गरेको थियो । कांग्रेस सांसदको नाराबाजीबीच सभामुख प्रदीपकुमार भण्डारीले विधेयक पेश गर्न सामाजिक विकास समिति सभापति थापालाई समय दिनुभएपछि कांग्रेसले नाराबाजी सुरु गरेको थियो ।
कांग्रेसको नाराबाजी बीच समितिका सभापति थापाले भने प्रतिवेदनसहितको विधेयक संसद बैठकमा पेश गरेकी थिइन् ।
कांग्रेसका सांसदहरुले भने रोष्टम घेराउ गदै संसदीय सवौच्चता कायम गर,अधिनायकवादी अभ्यास बन्द गर लगायतका सरकारविरुद्ध नारा लगाएका थिए ।
कांग्रेसले पुरै अवधि रोष्टम प्रयोग घेराउ गरी नाराबाजी गरेको थियो । संसद बैठक १५ मिनेटसम्म चलेको थियो । रोष्टम घेराउ गरी कांग्रेसका सांसदहरुले समितिका सभापति थेवेले पेश गरेको प्रतिवेदनसहितको विधेयक खोस्न खोजेपछि मर्यादापालकहरुले कांग्रेसका संसादहरुलाई घेरा हाली रोकेका थिए ।
सरकारले प्रदेशसभाको चालु अधिवेशनबाटै पारित गराउने तयारी गरेको उक्त विधेयक रोक्न कांग्रेसले लगातार संसद अवरोध गर्दै आइरहेको थियो । कांग्रेसले विधेयकमा समावेश गरिएको बोर्ड अफ गभर्नर्स नियुक्ति प्रक्रिया र मनमोहन पोलिटेक्निक कलेजका सञ्चालकलाई संरक्षक बनाउनेलगायतका प्रावधानमा असहमति जनाएको छ ।
सत्तापक्षले दुई तिहाईको दम्भमा जवरजस्ती विधेयक पारित गर्न खोजेकाले त्यसको प्रतिवादमा काग्रेस उत्रिएको बताउदै आएके छ ।विधेयकलाई कुनेपनि हालतमा पास गर्न नदिने अडानमा काग्रेस यथावत देखिएको छ ।
यसअघि गत सोमबार र मंगलबार पनि कांग्रेसले विधेयक सच्याउन माग गर्दै संसद अवरोध गरेको थियो । कांग्रेसले असोज १ गतेको बैठक पनि अवरुद्ध गरेपछि सभामुख भण्डारीले छलफलका लागि भन्दै ५ दिन संसद स्थगित गरेका थिए । तर यसबीचमा पनि सहमति नभएपछि प्रदेशसभाले कांग्रेसको अवरोधकै बीच विधेयक अघि बढाएको हो ।
कांग्रेसको अवरोधका बीच प्रतिवेदनसहितको विधेयक बैठकमा पेश भएपछि सोमबारसम्मका लागि संसद बैठक स्थगित भएको छ ।
