२४ असोज, रसुवा । नौकुण्ड गाउँपालिका–१, थाङदोरमा निर्माण भइरहेको फलाखुखोला जलविद्युत आयोजनाको कामले तिहारपछि मात्र निरन्तरता पाउने भएको छ ।
वर्षाका कारण असार अन्तिमदेखि आयोजनाको निर्माण कार्य ठप्प छ । वर्षाको समयमा काम गर्न नसकिने भन्दै चिनियाँ कामदार फर्किएपछि आयोजनाको काम रोकिएको हो ।
१४ दशमलव ७ मेगावटको आयोजनाको ३० प्रतिशत काम मात्र सकिएको छ । डेड वर्षभित्र निर्माण कार्य सकाउने आयोजनाको जिम्मा पाएको चिनियाँ ठेकेदार चोङकिङ वाटर टर्वाइन वक्र्स कम्पनी लिमिटेड (सीडब्लूटीडब्लू) ले जनाएको छ ।
यार्सामा हेडवक्स रहने आयोजनाको घिचेतमा पावर हाउस रहनेछ । आयोजनाले जग्गा अधिग्रहण, लाइन निर्माण, बाटो निर्माण र क्याम्प निर्माण सम्पन्न गरेसँगै संरचना निर्माणको काम अघि बढाएको बेत्रावती हाइड्रो इलेक्ट्रिक कम्पनीले जनाएको हो ।
आयोजनाको लागत भने दुई अर्ब ४० करोड रुपैयाँ रहेको छ । दुई हजार तीन सय मिटर टनेल र एक हजार आठ सय मिटर पेनस्टक रहने आयोजनाले बताएको छ । जसमा तीन सय मिटर टनेल निर्माण भइसकेको छ ।
आयोजनाको सुरक्षाको लागि नेपाली सेनाको कालीजंग गणको क्याम्प राखिएको छ ।
