२४ असोज, विराटनगर । नेपाल प्रहरीले ६४ औँ प्रहरी दिवस देशभर विभिन्न कार्यक्रम गरी मनाएको छ । १ नम्बर प्रदेश प्रहरी कार्यालयले पनि विभिन्न कार्यक्रम गरी प्रहरी दिवस मनाएको छ ।
प्रदेश १ का मुख्यमन्त्री शेरधन राईको प्रमुख आतिथ्यतामा सम्पन्न कार्यक्रममा अमर प्रहरीलाई श्रद्धान्जली ब्यक्त गर्नुका साथै कार्यसम्पादनका आधारमा उत्कृष्ट बनेका प्रहरी कर्मचारीलाई सम्मान गरिएको छ ।
प्रहरी दिवसमा आयोजित कार्यक्रमलाई सम्बोधन गर्दै मुख्यमन्त्री राईले यस दिनसम्म आईपुग्नुमा कर्तव्य पालनाको शिलशिलामा ज्यान गुमाउने अमर प्रहरीहरुको ठूलो बलिदान रहेको बताए । उनले देश समृद्धिको यात्रामा अघि बढिसकेको बताउँदै सबैले आ–आफ्नो ठाउँबाट देशप्रति र जनताप्रति उत्तरदायी र जवाफदेही भएर शुसासन कायम गर्दै विकास र समृद्धिको लागि योगदान दिनुपर्नेमा जोड दिए । उनले छिट्टै नै प्रदेश प्रहरी ऐन बनाएर प्रदेशमा छुट्टै प्रहरी संगठन तयार गरि नमुनाको रुपमा प्रस्तुत गर्ने सोचका साथ अघि बढिरहेको बताए ।
कार्यक्रममा प्रदेश १ का प्रहरी प्रमुख डिआईजी ठाकुरप्रसाद ज्ञवालीले प्रहरी दिवसले देश र जनताको सुरक्षामा अझ कटिबद्ध रहन हौसला प्रदान गर्ने बताए । उनले शान्ति सुरक्षा कायम गर्न र जनताको सेवामा जुट्न मातहतका प्रहरीलाई निर्देशन समेत दिए ।
कार्यक्रममा प्रदेश सरकारका आन्तरिक मामिला तथा कानुन मन्त्री हिक्मत कार्कीले प्रहरी कर्मचारीका उत्कृष्ट सन्तानलाई छात्रवृत्ति प्रदान गरेका थिए ।
कार्यक्रममा नेपाल प्रहरी, पूर्व प्रहरी, अमर प्रहरीका परिवारका साथै विभिन्न क्षेत्रका ब्यक्तिहरुको समेत उपस्थिती थियो ।
