२९ असोज, काठमाडौं ।
एसिड आक्रमणमा परेकी बालिका मुस्कान खातुनलाई क्रिकेटर पारस खड्का, नेपाली क्रिकेट टीमका प्रशिक्षक उमेश पटवाललगायतले भेट गरेका छन् । बुधबार मुस्कान उपचाररत कीर्तिपुर अस्पतालमा पुगेर पारस र पटवालसहित क्रिकेट खेलाडी सोमपाल कामी, अविनाश बोहराले मुस्कानलाई भेटेका हुन् ।
मुस्कानलाई भेटेर फर्किएपछि क्रिकेटर पारस खड्काले सामाजिक सञ्जाल फेसबुकमा मुस्कान आफूहरु सबैका लागि अनुकरणीय भएको लेखेका छन् । उनले मुस्कानको मुहारमा सधैं हाँसो देख्न चाहेको उल्लेख गर्दै एसिड आक्रमण गर्नेहरुलाई कडा कारबाही गर्न सरकारसँग माग गरेका छन् ।
उनले भनेका छन् ‘यस्ता जघन्य अपराधमा संलनलाई सरकारले कडा कारबाही गर्नुपर्छ, हामी सबै मुस्कानको साथमा छौं’। मुस्कानको उपचारमा सहयोग जुटाउँदै आएका समाजसेवी उज्वलविक्रम थापाले क्रिकेटरहरुलाई मुस्कानसमक्ष र्पुयाएका थिए । एसिड आक्रमणमा परेपश्चात लाई देश तथा विदेशका कलाकारहरुले सन्देश पठाएर तथा भेटेर मुस्कानलाई निकै उत्साह थपिरहेका छन् ।
बलिउडका कलाकारहरु अमिताभ बच्चन, वरुण धवन लगायतले मुस्कानको विषयमा भिडियो सन्देश पठाएका छन् भने नेपाली कलाकारहरु राजु लामा, राजेश हमाल लगायतले पनि अस्पतालसम्मै पुगेर मुस्कानसँग कुरा गरिरहेका छन् । हमाल मंगलबारमात्रै मुस्कानलाई भेट्न पुगेका थिए ।
