१५ कार्तिक, मकवानपुर । मकावानपुरको हेटौँडामा ६ वर्षअघि विन्दवासिनी कंसाकारलाई एसिड छ्यापेर फरार रहेका भारत महाराजगञ्ज अमरपूर्वन ६ का ‘राज’ भनिने दिलीपराज केशरीलाई प्रहरीले पक्राउ गरेर सार्वजनिक गरेको छ ।
सार्वजनिक कार्यक्रममा बोल्दै पीडित कंसाकारले एसिड छ्यापेर भाग्ने केशरीलाई कडा कारबाहीको माग गरेकी छन् । हेटौँडाको मेनरोडमा रहेको आफ्नै पसलमा बसिरहेको समयमा कंसाकार एसिड आक्रमणमा परेकी थिइन् ।
एसिड प्रहारबाट दशैभरि धेरै पीडित रहेकाले उनीहरुको न्यायको निम्ति पनि मृत्युदण्डको सजाय दिनुपर्ने कंसाकारले पत्रकार सम्मेलनमा माग गरेकी छन । प्रहरीले केशरीलाई बारा जिल्ला जितपुर सिमरा उपमहानगरपालिका २३ को भलोहीमा लुकेर बसेको अवस्थामा पक्राउ गरेको थियो ।
प्रहरी महानिरीक्षक सर्वेन्द्र खनालको निर्देशनमा निरन्तर खटिएको प्रहरी टोलीले केशरीलाई पक्राउ गर्न सफल भएको हो । झण्डै ६ वर्षअघि एसिड छ्यापेर फरार रहेका केशरीलाई शुक्रबार मकवानपुर प्रहरीले पत्रकार सम्मेलन गरेर सार्वजनिक गर्दैगर्दा विन्दवासीनी कंसाकारले आक्रोशीत हुँदै पीडक दिलीपलाई आक्रोश पोख्न लाग्दा प्रहरीले रोकेको थियो । तर पनि दिलीपलाई पत्रकारकै सामु पटक पटक झम्टेर पिट्न लाग्दा कंसाकारकै आफन्तले पनि रोकेका थिए ।
एसिड आक्रमणबाट गम्भीर घाइते भएकी कंसाकारले उपचारका क्रममा अहिलेसम्म ८० लाख रुपैयाँ खर्च भएको बताइन् ।
